Car Papà Nadal,

T’escrivi aquela letra un pauc en avança per que la pòscas legir tranquillet sus ta nívol que çò que te demandi es fòrça important.

Aquesta annada soi estada plan brava amb tot lo mond, enfants, felens, fraire, sòrre, cosins e per çò qu’es de l’òme… te li cal demandar ! Cridèri pas aprèp lo vesin qu’acantona la veitura sul trepador que pòdi pas passar, tanpauc aprèp los motociclistas que te tustan sus la veitura se lor daissas pas lo passatge. Ai pas gastat tot mon argent en crompant de colhandras vengudas de China e tornèri pas vendre sulcòp lo present de la cosina Pauleta. Faguèri plan atencion de manjar 5 fruchas e legums per jorn, de triar las escobilhas e donèri a manjar als aucelons en invèrn !

Veses, car Papà Nadal, qu’amb tot aquò ai plan meritat çò que me vas portar lo 25 de decembre.

S’es pas tròp demandar voldrái plan que me mandèsses de politicaires vertadièrs per cambiar aqueles incapables que nos govèrnan dempuèi d’annadas. N’ai un sadol d’aquela clica que nos explican de far çò que dison e d’agachar pas çò que fan. Que te dison tot e son contrari, que justifican l’injustificable, que, a la fin, paures nautres, ne demoram tot desvariats.

Tant que i siás porta-me un climat que fa pas fondre los glacièrs, desbordar las ribièras, avançar lo desèrt e que nos estofa pas dins las vilas.

Enfin se podiás menar lo solèlh del Miègjorn a Paris (pas tròp pr’aquò que i son pas acostumats) aquò, benlèu, fariá cantar e sorrire las gents dins lo Mètro e m’ajudariá a doblidar lo rambalhadís de la vida.

Te mercèji plan e te fau lo poton …

Monica B

PS Auriái plan volgut te demandar d’arrestar las guèrras mas aquò, sabi qu’es tròp demandar. Los guerrejaires de totas menas son pas a mand de t’escotar…