Fa catòrze ans que Jornalet vos desvelha cada matin en occitan. Catòrze ans sens interrupcion. Catòrze ans d’informacions, d’editorials, d’entrevistas, de cultura e de contenguts divèrses tot en occitan. Catòrze ans que demòstran una causa fòrça simpla: l’occitan es una lenga viva. Una lenga que pòt informar, explicar lo Mond, far rire e esmòure, e quitament crear de ligams entre occitans d’accents diferents.
Se deman Jornalet se calèsse, quantes mèdias demorarián per contar l’actualitat en occitan cada jorn? Quantes espacis demorarián ont un occitanofòn o un aprendís d’occitan poiriá legir sa lenga sus Internet? Quantes sits demorarián ont l’occitan foguèsse una lenga normala, de cada jorn, e non pas sonque una lenga de patrimòni? La responsa fa paur.
Per aiçò fasèm una crida. Dempuèi catòrze ans, Jornalet subreviu amb fòrça imaginacion, fòrça oras de trabalh e fòrça sacrificis personals. La còla es pichona: dos redactors, un lingüista, un locutor, un tecnician e un estratèg. Los salaris son simbolics. L’an passat, quitament los tornèrem a l’associacion per ajudar a pagar las facturas e manténer lo jornal en vida.
La màger part de nòstres revenguts dependon d’una subvencion de la Generalitat de Catalonha. Aquesta ajuda es indispensabla, mas ongan torna arribar tard. Mentretant, las facturas contunhan d’arribar e la tresaurariá s’es agotada.
Tala es la realitat. E ara tornarmai demandam d’ajuda als legeires. Non pas per manténer lo passat mas per bastir l’avenir.
L’an que ven, volèm lançar lo Jornalet de la generacion venenta. Un Jornalet mai modèrne, mai adaptat als usatges dels joves, mai simple de legir sul telefonet e sostengut per una vertadièra comunautat d’abonats. Es ja teorizat e dessenhat, sonque nos cal la moneda e per aiçò una ajuda especiala es demandada. Esperem qu’arribe pas tròp tard e que siá generosa. Mentretant, nos cal perseguir.
Se legissètz Jornalet cada jorn, s’i avètz descobèrt una informacion, una idèa, una cançon, una persona o un país que coneissiatz pas, se pensatz que l’occitan a sa plaça sus Internet, alavetz vos demandam de participar.
Pas besonh de gròssas somas. Un don pontual o recurrent de 5, 10, 15 o 20 èuros per mes. Per un mèdia occitan, aquò o pòt cambiar tot.
A l’occitan fan mestièr d’escòlas, d’associacions, de musicians, d’escrivans e d’institucions. Mas li fan mestièr tanben de mèdias. E los mèdias existisson pas per miracle. O si! Mas aquel miracle, l’avèm fach ensems, la còla e los legeires, pendent tot aqueste temps. Es una comunautat qu’a decidit de far viure e ara tornam cridar.
Podètz ajudar Jornalet per Stripe, per PayPal, per virament bancari o per chèc a l’òrdre dels Amics de Jornalet.
Los dons faches de Catalonha estant benefícian de deduccions fiscalas dins l’impòst dels revenguts (IRPF). E se qualqu’un pòt ajudar Jornalet a trobar las bonas pòrtas dins l’administracion francesa, los dispositius de finançament o las possibilitats de collaboracion amb l’ÒPLO, aquò serà tanben una ajuda preciosa.
Perque, fin finala, Jornalet es quicòm mai qu’un jornal. Es una aventura collectiva. E las aventuras collectivas an una particularitat: existisson sonque quand fòrça personas decidisson de las contunhar.
Mercés per vòstra lectura. Mercés per vòstra fisança. E mercés per ajudar Jornalet a contunhar de parlar occitan cada jorn.
Cossí participar a la campanha “Non volèm pas que Jornalet se cale”
- Far un don pontual per Stripe (amb carta de credit)
- Far un don pontual per Paypal
- Transferiments bancaris
- Caisse d’Epargne (LOS AMICS DE JORNALET)
- IBAN: FR76 1348 5008 0008 0080 4698 230
- BIC: CEPAFRPP348
- Caixa d’Enginyers (ASS DIFUSION OCCITANIA EN CATALONHA)
- IBAN ES79 3025 0001 1414 3339 8145
- BIC: CDENESBBXXX
- Caisse d’Epargne (LOS AMICS DE JORNALET)
- Mandar un chèc a l’òrdre de l’associacion Los Amics de Jornalet (6 carrièra Victor Hugo / 11500 QUILHAN)
- Nos escriure per ajudar a las formalitats amb l’administracion francesa
-
Contractar de publicitat sus Jornalet
0 commentaires