Anem, anem: es vengut lo temps de prene vòstra plaça dins lo balèti! Anatz pas esperar que lo Trompeta dobrigue sa grandarassa sala de bal dins una ala (o la cuèissa?) de l’Ostal blanc, non?

A Tahiti, dançarai lo tamure amb un oistiti. 

A Siracusa, farai balet nautic amb una medusa.

A Atènas, beurai un veire de raqui abans de dançar lo sirtaquí e cromparai una cantina d’ozò per pas passar per un zozò.

Soi pas pro caucasian per vos explicar lo cèrcle circassian.

A Accà, la causida serà entre polcà e mazurcà, pas question de ha-kà!

A Santiagò, cercarai lo Carlòs Gardèl per dançar lo tangò, mas me diràn qu’es a Buenos Aires. 

Se vas a Riò, en genièr, poiràs dançar la capoeira a ne pèrdre lo cap! 

Aquò val lo còp de dançar lo kasatchòk en Russia.

En China, ages pas paur: es en dança que s’afrontan dragon e lion.

Al balèti, riscas pas de rescontrar lo ièti (provèrbi nepalés).

A Rigà, me trapèri presonièr d’un rigodon: me calguèt una riga-raga per m’escapar.

Val mai polcà picada qu’un veirat de piqueta.

Amb l’Andromaca, jamai s’acabarà l’andrò en tèrra bretona.

A Bisanòs, coneisson pas lo fest-noz.

A Vilaspin, sautarai coma un lapin.

A Bordèu, cal èsser gironda per dintrar dins lo rondèu.

A Nimes, a las pòrtas de l’Ostal Carrat, farem la ronda.

En Corèa o en Corrèsa, beurai chicorèia abans de dançar la borrèia.

A Malagà, coneisson que la malagueña! 

Sabi pas se la sardana es de mòda a Barbentana.

Sabon res de Brazzavila nimai de Lumumbà, mas dançan lo congò! 

A Tolosa, plaça Esquiròl, vendrà lo temps del ròc-end-ròl: anirai coma un caval fòl!

Plaça al bolerò de Revèl! 

À Salzan, salça e naps en primièr, salsà en seguissent.

Al temps de las fècas, Limós es un grand confèti. 

A Bandòl, la farandòla mena Carnaval.

Macarèl, aquí la musica de la macarenà.

Al Molin-Roge de París, las dròllas fan de french-cancan. Al vilatge, sul banc, al pè del vièlh molin, las mametas cancanejan en òc suls un-a-s e los-as autres-as, mas sabon res del kan ha diskan breton! 

A dançar lo branle, pèrdes l’equilibri. 

Cal pas confondre dança de salon e dança de saloon: cambiatz de cavalièra! 

En Carcin, fan la ronda en redond, redond de bruèissas ont s’amagan las trufas negras! 

Al balèti de Monredond, lo Boçut se crompèt una Bòça nòva. 

Mai d’un còp dins lo roman Fanfan la tulipe, l’eròi dança lo fandangò. 

Val mai saupre marchar al pas per se lançar dins una marchesa. 

Gigoti-gigotà, ara es l’ora de la giga a Gigondàs. 

A Tarenta, dançaretz la correnta. 

A Gavarnia, los gavians vòlan sus un aire de gavòta. 

Lo discobòl fasiá lo DJ dins una boita de nuèit.

Tant que vira lo disc, se dança lo discò.

Sioplèt, me prenètz pas per una quicha lorrena, mas sabi res de l’escoticha!

A Bogival, un aire de bogui- vogui!

Se val mai rambar quand ausisses tres nòtas de rumba!

Sus la plaça de la capèla de Montasèls, dançarem la chapelesa. 

La country s’es espandida dins totas las contradas.

Dins lo canton, dins cada recanton, sabèm dançar lo charleston plan melhor que Charlton Heston.

A Lombès, la dança dels tirons se ditz lambadà!

En sortent del sok, anèri a una serada de zok.

A Chamalièras, en plaça pel cha-cha-chà! (… e sens miaulejar!)

A Madiran, al Jardin del Plan carrat, se balhan rendètz-vos los afogats de madison.

A Menton, lo mambò te rendrà mai polit. 

Ip-òp, la serada s’acabarà al galòp! 

E ping, e pong, un pè seguís l’autre: es l’ora del swing!

Agantaràs pas una tendinita en dançant l’eslòv!

Cal pas tròp manjar de pastissariás de Vièna abans de se lançar dins una valsa… 

De tot biais, anirai pas al balèti (anirai benlèu a las vòtas, mas segrai pas lo bal!) que soi puslèu un dança-a-l’ombra (un fenhant). Mèfi a la contra-dança, mas qué volètz: teni pas la fèbre dançarèla e coma ditz lo provèrbi*:

Qual-a dança, s’emplena pas la pansa!

Aqueste s’ajusta als provèrbis notats pel Frederic Mistral, un ser, al retorn de las vòtas de Malhana: 

– A cantar, rire e dançar, l’esperit pòt pas mal pensar.

– Se dança melhor ventre plen que rauba nòva. 

– L’amor fa dançar los ases**.

– Qual ben canta e ben dança fa un mestièr que pauc avança.

– Fa qual pòt, dança qual sap.

– Cal dançar coma lo tamborn jòga.

– Se cal pas metre en dança quand volètz pas dançar.

– Quand los gats i son pas, los garris dançan.

– Quand siás en dança, cal dançar ; quand siás agantat, te cal virar.

E lo Mèstre confirmava nòstre dire amb aqueste provèrbi:

Abans la dança, ven la pansa!

Pasmens,

Damoisèla, avètz ges de dançaire? 

E aqueste dissabte 22 de novembre, venètz dançar a Saissac amb la Talvera!

Lo pè-de-galís Dansistica-Roch

*: Primièra atestacion atestada; **: Al punt de vos faire venir borrica.