Atal ?

Diga ! Siái pas acostumat de dire de mal a l’avança mas aquí francament ma lenga de pelha me prusís. Avètz vista la composicion dau govèrn que nos farguèt lo primièr de la classa ? 10 ministres sus 15, siaga 67% d’aquesta còla d’arlèris, son parisencs o çò qu’es parièr, francillians, d’aquesta illa de França que se pren per l’embonígol dau mond. E los autres 5 son de parlaponchuts aparisenquits. D’efièch, ges de ministres d’Occitania, de Catalunya nòrd, de la Bascoat francesa, d’Alsàcia, de Bretanha o de Corsega. Pas degun tanpauc d’ailà de la man de la mar. Son totes dau quart Nòrd de França.

En fach lo jovenòt primièr ministre faguèt sieuna la paraula celiniana que vesiá au Sud de Leire sonque bastards mediterranèus, Narbonoïdes degenerats, nèrvis, felibres repapiaires, parasits arabics etc … Sabe pas coma escapèrem a « Depardieu ministre en carga dels dreches de las femnas. » Seriá estat lo pompon sus Garona !

E tant qu’a i èsser vòlon anullar la fèria de Nimes e los eveniments bèlses d’en çò nòstres que tota la gendarmalha serà dins son París per sos Jòcs Olimpics que nautres pagarem qu’aquí se rementaràn de totes.

Vòls que te diga ?  E pasmens, pasmens aqueste govèrn que grafinhe se pòt conflar d’un primèr succès istoric ! A ja capitat lo miracle grandaràs de metre nòstres lingüistas d’acòrdi. Dau jamai vist dempuòi la despartida dau paure Alibèrt ! Aquí lo comunicat que faguèron : «  Causa conoguda siá a totas las e totes los que legiràn aquestas linhas, a totas las locutrises e locutors de la lenga nòstra, que nautres Congrès permanent per la lenga occitana, Academia occitana Consitòri dau Gai Saber, CLO, Universitats Pau Valery e Joan Jaurés e tutti quanti… acampats en session extraordinària preconizam l’abandon total e definitiu de l’adjectiu e advèrbi occitan  « ATAL » tròp politacament corrècte en Francimandia. Recomandam la fòrma « AITAL » o d’un biais mai dialectal los ANTAU e mai ENTAU de preferir absoludament a aquela fòrma. Los diccionaris seràn lèu corregits. »

Me daissère dire tanben que la Glèisa Catolica forabandissiá de sos missals los « Atal siá » o « Atal siaga ».

E òc, podèm pas dire « amèn » a tot.

Enfin, es çò que ne dise ieu…

La guinhada de l’IEO34. E, rau !