Vaquí una istòria de mon novèl espectacle :« COVID ? NON, ÒC VID !! ».  Es una adaptacion d’una istòria del regretat « Padena » (Robèrt Marti), mercé plan l’amic !

La dobertura de la caça de Batiston

Coneissètz Batiston de Colhonàs, lo vilatge a costat de Montadavala, mon vilatge ?

Batiston, es BRAVE, podèm dire qu’es bravàs !

 Èra lèu la dobertura de la caça e èra tot destimborlat  amb lo COVID e tanben aquel novèl biais de manjar : VEGAN !

 Manjaceba son amic es devengut VEGAN e  fa pas la dobertura de la caça, que vòl pas tuar de conilhs o  de lèbres !!VEGAN

Manjaplan, un autre amic, el es pas VEGAN, qu’aima plan la carnsalada, la salvatgina e tota mena de carn !

L’autre jorn , Batiston diguèt a Manjaceba :

-Me fas cagar amb ton VEGAN ! Ieu soi  VEGAN d’Avairon !

–VEGAN d’Avairon ?diguèt Manjaceba.

-De segur ! VEGAN d’Avairon .

E de cridar : « Volem EngolirGras Animal Natural » e de lo dire 3 còps !!

 Manjaceba sabiá pas ço que li arribava e partiguèt cap baissat.

Mas caliá faire la dobertura de la caça e  amb la masqueta !

-Anam aprestar un polit dejunar coma de costuma, masqueta o pas masqueta ! diguèt Manjaplan.

Alavetz  se despartiguèron lo trabalh. Manjaplan : lo saucissòt, 4 lescas de cambajon, un brave pan, un litre de vin, Batiston 4 formatges de cabra, un mètre de salcissa cuècha, un polit pastisson, lo termòs de cafè.

A las aubetas, lo jorn de la dobèrtura partiguèron sul Larzac amb lo can qu’èra plan vièlh  e gaire caçaire!

 Fasiá una pichòta ora que marchavan, e Manjaplan diguèt : « Caldriá  manjar un bocin qu’ai talent !

E aquí lo dejunar! Mangèrona se faire petar lo ventre ! E lo cafè .

Mas aquel  cafè te fasiá bolegar tot aquò !  Batiston diguèt :

« Cresi que me cal anar pausar lo dejunar, me’n vau dins un bartàs !

–    E, cridèt Manjaplan, as lo papièr ?

–    Lo papièr ?

–    Òc, lo papièr, lo papièr per cagar !

–    Me damne, dempuèi lo temps que cagui ai pas besonh de mòde d’emplec !!!