Rescontres d’estiu…
Aprèp la marana del covid, lo mond tornèron nombroses a las doas escolas d’estiu, a Vilanòva d’Olt al mes d’agost (eoe – ieo 47) e a Nimes al mes de julhet (eo30.org/marpoc/). A Nimes se parlèt d’urgéncia climatica e lingüistica. Dins lo quadre de l’annada Molière, Claudi Alranq joguèt un espectacle en occitan e francés, «Molière face sud».
Lo rescontre venent serà a l’EOD (Escambis occitans de la davalada) que se debanarà dins Gers en novembre. Se parlarà de la socializacion de la lenga.
L’IEO foguèt a las rencontres de Salinèlas dins Gard au començament de l’estiu (literaturas d’òc actualas). IEO Edicions tenguèt un banc de libres a l’estivada de Rodés en julhet. I aviá tanben l’IEO Limosin, l’IEO 24 e l’IEO 26. Se parlèt en particular del roman policièr occitan (F. Vernet, J. Peladan, J. Ganhaire).
Lo GPS occitan es arribat
Lo GPS permet de viatjar dins l’espaci en fasent servir las mapas occitanas. Son de membres de l’IEO que, a 94%, an recobrat los toponims occitans per fargar aquelas mapas. L’aplicacion GPS se sona OsmAnd e se teledescarga per l’Apple Store ò Google Play Store. OSM (Open Street Map) es un projècte de cartografia liura e collaborativa, concurrenta de GoogleMap. L’IEO n’es membre actiu e trabalha dempuèi d’annadas a fargar la mapa d’Occitania amb lei mencions en lenga nòstra. OsmAnd vòl dire OpenStreetMap automated navigation directions.
Dintre de l’aplicacion teledescargada, cal causir l’occitan dins lo menut : configurar la mapa–> lenga de la mapa. Los començaires pòdon contactar l’IEO e mai precisament Pèire Brechet per aver una visio-presentacion. Una vidèo o explica tot sus la pagina Facebook dau Projècte Geoccitania.
L’IEO renovelèt sa participacion a l’Unesco
L’IEO èra club afiliat a la FFCU (Fédération française des clubs pour l’Unesco) e normalament deu èsser acreditat per « club per l’Unesco ». Aquò vòl dire que, per sas accions, l’IEO sosten las valors universalas de l’Unesco : cultura, educacion, patrimòni. L’IEO es reconegut coma un obrador de cultura universala e de ciutadanetat mondiala. Los membres de l’IEO an lo dreit d’utilizar lo logo de l’Unesco (ffcunesco.org).
L’IEO Edicion : soscripcion e projèctes corrents
Dos libres son en cors d’edicion, “Contratemps” de G. Tautil, e “Robèrt Martí, l’òbra-vida”, per lo
quau una soscripcion es estada lançada (fins al 15 de novembre). La soscripcion es en pagina 3
d’aiceste bulletin. Uèit libres agotats son maitot en cors de reedicion (notadament lo metòde d’aprendissatge de  l’occitan). Es maitot previsda d’aiçí la fin de 2022 (o au començament de 2023) una plega novèla.
Per 2023, daus manuscrichs son estats reçaubuts per publicacion dins las colleccions A tots, Flor  Envèrsa e Messatge.
Los membres de l’IEO comunican
IEO-OPM. Una iniciativa originala : una Galariá virtuala d’art occitan es a durbir lo 16/10 dins lo cadre del festenal occitan. L’IEO OPM (Occitània Pirenèus Mediterranèa) fa un fum de causas e contunha d’editar Lo Diari. Per ne saupre mai : ieo-opm.com
IEO31 – La Tuta d’Òc, librariá occitana, prepausa una tièra novèla de rescontres literaris. Lo 10 d’octòbre serà lo torn de Sèrgi Carles de parlar de traduccion. Desenant, lo mond auràn un catalòg en linha per crompar de libres : http://www.libraria.latutadoc.com. Se pòt tanben abonar a la gaseta electronica.
IEO31. Lo festenal vira 2 meses de temps pel redon tolosenc. Lo desplegant es aicí :
http://festivaloccitania.com/. Pels corses gaitar aquí : https://www.coursdoccitan-ieo31.com/.
IEO09 – L’IEO d’Arièja publica un agenda e una letra d’actualitats. Cal vistalhar lo site (https://arieja.ieo-opm.com) per teledescargar la letra e descobrir çò organizat. L’IEO es a mand de publicar un libre de «Dire e Provèrbis del Bolvèstre» acampats per André Minovez. Una conferéncia de Patrici Pojada sus «Las Relacions occitano-catalanas dins l’istòria» nos rementa la
proximitat de las culturas catalanas e occitanas.
IEO11 – l’IEO-Aude programa a la mitat de novembre una Setmana de la paraula (a Puègnautièr e Carcasona). Entre lo 20 e lo 27 de novembre, l’IEO11 celèbra lo bicentenari de la naissença d’Aquiles Mir, lo celèbre felibre audenc.
Saissac d’Òc : Una setmana occitana se tendrà dins aqueste vilatge de la Montanha Negra del 28 de novembre al 3 de decembre.
Lo Cercle Occitan de Grussan prenguèt part a l’edicion d’un album realizat pels escolans del vilatge : Las aventuras de Luc, lo chòt bèl.
Fasètz la lenga en Cabardés organiza activitats multiplas (grop vocal, lenga, quina). Sa quinzenada de 2023 se dobrirà per una representacion d’Antigòna per TIO-La Rampa
L’IEO34 regrope un trentenat d’associacions. A tanben una activitat de publicacion, una botiga a Besièrs e una letra d’informacion que l’abonament se fa sul site ieo-erau.com. Demest las anóncias:
D’aicí d’alai (34) festeja la davalada, lo 15 d’octòbre, amb una serada contas e castanhas. La
contaira bilingüa es Ester Lucada. Traparetz tanpauc un agenda que fa fum de tota lenha: balèti,
teatre, concèrt, lòto…!
Cercle Occitan gabianenc (34) – Lo 14 d’octobre Domenge Caucat tornarà sus la vida del jornau occitan, La campana de Magalona que faguèt petar la lenga occitana pendent 40 ans. L’èime clapassièr del jornau se perlonga 80 après que son cant se siaguèsse escantit… (a la sala de las fèstas).
IEO47 – La 13ena quinzena occitana se debana pendent lo mes d’octobre (quinzenaoccitana.monsite-orange.fr). De membres de l’EOE (Escola Occitana d’Estiu a Vilanòva
d’Òlt ) an congreat los Escambis de la Davalada en novembre (http://eoe-oc.org ) e son tanben dins lo Luquet, una pichona associacion del nòrd tolosenc (http://lo-luquet-occitan.fr).
IEO33 – L’hestenau mascaret torna per sa 11ena edicion. Una brava programacion qui durarà fins al
5 de novembre. Se poirà escotar lo gascon e lo landés mercé a mai d’unes films e pèças de teatre.
D’òbras son d’interès etnologic. Mas i a mai qu’aquò (ostau-occitan.org).
IEO Perigòrd (24) – De libres novèls : Lo Cant de Montfort, Per l’Amor e Dialògues Occitans (lemosin) e una brava session de dediçaças, lo 22/10, en la libraria Marbot (Perigüers). Tanben : trenta lòcs de corses, las activitats del talhièr de cultura occitana, la dança etc… (www.novelumieo24.fr)
IEO PACA – En setembre se passèt dos eveniments importants. Premier foguèt l’omenatge public a
Anna-Maria Poggio, qu’aviá totjorn dich que voliá pas que se plorinegèsse mai que se faguèsse la fèsta. Ansin lo mond se remembrèt d’ela au son de Mauresca Fracàs Dub. Lo segond es lo congrès dau Forum d’Òc que lo subjècte n’es : Lenga e terraire coma cultivar l’avenidor de Provença
(forumdoc.org).
IEO13 – De notar la representacion teatrala dau novèl episòdi de la Crozada d’Uei de Patrick
Hutchinson, Lo Revenge de Murèth.
IEO06 – Participacion au festivau dau libre de Moans Sartòu de renomada nacionala. Banc ont son
presentadas leis edicions de l’IEO06 tant coma aquelei de l’IEO regionau. Presentacions de libres sus lo pontin: Tant totun m’encalavi d’Anna Maria Milardi, Còntes per contar, e Amontanhatge de Miquèu Arnaud
IEO26 – En Droma, lo 15 d’octobre, la jornada del patrimòni occitan serà dedicada al flume Ròse e sei ribairencs. Lo Rebiscòl montelenc presentrà son film sus Ròse, avans sa canalisacion. Per tot saupre (concèrt, repais, conferéncia…), demandar lo desplegant a IEO26 (ieo26@ieo-oc.org).
IEO63 – Desempuei 8 ans, la mòstra regionala “Paraulas de país !” persèi sa virada en Auvèrnha e se ‘trapa vès la Mediateca que vès Lesós d’aicí le 14 d’octòbre, acompanhada d’animacions : taulas-redondas ‘bei de locutors dau quartèir, projeccions de filmes amators en auvernhat… Le 19
d’octòbre que ven, diens l’encastre de las Occitanas 2022-2023, l’IEO 63 recebrà l’autor Florian Vernet sobre le tematica “Darrèir de que cor mas l’occitan ?”
Contactes IEO :
contacte general e administratiu : direccion@ieo-oc.org / tel. 06 34 16 63 90
Contacte Endacòm mai : ieo.endacommai@gmail.com
site general : https://ieo-oc.org/ site edicion : https://ideco-dif.com

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.