Emission Lo Jornalet

 

 

 

Capture decran 2023 12 06 123523
brown and black wolf in close up photography

Lo lop tornèt en Occitània en 1992 per Mercantorn. Trenta e quatre ans après, l’estat francés prevei de lo fusilhar indiscriminadament.

Coma o explicàvem aqueste dissabte, dos projèctes d’arrestat son en consulta publica fins al 22 de novembre. Preveson de permetre de tuar de lops sus simpla declaracion, dins totas las comunas e per totes los tropèls. Preveson tanben de los fusilhar dins las resèrvas naturalas e dins los pargues estatals. Los lops que seràn pas estats abatuts dins l’annada o poiràn èsser l’an seguent. Amb aquò, lo lop es pas pus una espècia de la fauna occitana; es una quòta, una linha comptabla, un sòlde de reportar.

Las chifras son claras. Lo plafon de 2026 es de 227 lops, e lo 3 de novembre n’i aviá ja 219 d’abatuts. La populacion es estimada a l’entorn de 1082 individús. Aquò fa un lop sus cinc, cada an, per decret.

Pasmens, degun a pas demostrat que los tirs reduguèsson la predacion de biais duradís. Mai d’un estudi suggerís quitament lo contrari: una ardada desorganizada pòt far mai de mal als noiriguièrs. La politica del fusilh es una politica de l’aparéncia. Rassegura, mas protegís pas.

O cal dire: los noiriguièrs e los pastres an rason de se plànher. Un atac es una pèrda, un tropèl esglasiat, de nuèches sens dormir. Sus Larzac, en Gavaudan e dins las encontradas nautas de Provença, la colèra es vertadièra. Pasmens, la responsa es pas l’abatatge. Es de garentir una biodiversitat salvatja que permeta de far viure los lops sens crebar de talent, es de proteccion pels pastres, son de palissadas electrificadas, d’indemnizacions rapidas e justas... Es, en fin de compte, de politicas que prepausen de mejans sul terren, e non pas de cartochas.

En Finlàndia, l’administracion vòl tuar l’ardada de Kivikiekki pr’amor que lo parelh reproductor es format d’un fraire e d’una sòrre. La consanguinitat es pasmens lo simptòma d’una populacion tròp pichona e tròp isolada. I respondre en eliminant l’ardada es garir la fèbre en tuant lo malaut. E l’agéncia sap quitament quantes lops i a dins lo tropèl.

Euròpa a afeblit la proteccion del lop. La Convencion de Bèrna e la Directiva Abitats l’an fach passar d’«estrictament protegit» a «protegit». Alemanha l’a inclús dins sa lei de caça. Totun, la justícia suedesa ramenta una evidéncia: es a qui vòl tirar de provar que pòt tirar sens metre en perilh l’espècia. Aquò es la lei, e pas un detalh.

Lo lop es pas solament una question d’ecologia. Es tanben una partida de nosautres. Es dins los contes de velhada, ont lo lop golut se fa totjorn enganar pel rainal. Es dins los provèrbis: «Quand se parla del lop, se’n vei la coa». Es dins aquela ora malsegura que li disèm «entre can e lop». Es dins la Bèstia de Gavaudan, que faguèt tremolar lo país al sègle XVIII e que ne faguèrem un mite. Es dins las legendas dels menaires de lops. Es dins los topònims semenats de las Alps als Pirenèus: las Lobièras, los divèrses Pas del Lop, los Ròcs del Lop... Lo lop nos a fargats tant coma l’avèm fargat.

Un ecosistèma sens predator es un ecosistèma desequilibrat. Lo lop regula los cabiròls, los cèrvis e los singlars. Es una pèça de la biodiversitat, e non pas una gèina.

Los occitans sabèm çò que vòl dire èsser tractats coma una gèina que cal reduire a una quòta. Aquò se deuriá veire coma una rason de mai per refusar aquela logica.

D’aicí al 22 de novembre, cadun pòt participar a la consulta publica e dire de non. Aquò  pren sonque dètz minutas. La peticion per l’ardada de Kivikiekki tanben demanda una signatura.

Lo lop tornèt sens demandar permission. Ara nos demanda de saber viure amb el. Un país sens lops es un país mai paure. Un país que los sap pas acceptar, tanben. En fin de compte, los occitans sabèm plan çò qu’es la convivéncia.