Diga ! A la bèla maire n’i arribèt una, passat ièr. Figuratz-vos que volguèt préner rendètz-vos amb son osteopata, una dròlla geniala que d’una gibossa vièlha e cruchida te ne fa, en doas sesilhas, una polideta mameta de las sèts beutats, regda e botonada, drecha coma lo paissèl de castanhièr novèl que metes au malhòl.

E veja-te aquí la sògra que pren sa tauleta tactila e que ie demanda, mercé la reconoissença vocala, lo numèro de telefòn a Aniana. Solament, solament, la bèla maire se la peta totjorn un pauc e s’ensaja a parlar ponchut. E lo daquòs d’i donar un numèro de telefòn a Amiens, au diable Vauverd darrièr la glèisa, e ela de préner rendètz-vos sens se’n trachar… Vos daisse imaginar l’embolh : l’osteo de Niana que la volguèt pas recebre, ela que s’emprebrinèt e l’autra d’amondaut que se faguèt de laguis de la veire pas arribar.

Amb aquelas tecnologias novèlas n’avèm pas finit d’èsser espantats. Legiguère qu’un parelh de francimands que fasiá l’amor sus son radassièr Dequéia sens aver desbrancat Alexa, la reconoissença vocala dels ostalses brancats, se vegèt liurar l’endeman cinquanta dvds de Oui-Oui, lo dessenh animat per los drollons. I a tanben aquela, que fa pas gaire, siaguèt fotografiada als cagadors per Roomba son robòt de netejatge e la maquina de portar lo paquet ont èra pas esperat, valent a dire sus Fàcia-Boc e de postar la fòto en linha.

Vòls que te diga ? La dòna seriá anada, coma tot lo mond aquí, cagar a la vinha, serián estats fotuts de la filmar amb un dròne. E amb l’ivèrn qu’arriba enfin, las fuòlhas an finit per tombar… Los tempses que son los nòstres son venguts complicats.

Enfin, es çò que ne dise, ieu !

La guinhada de l’IEO34. E, rau !!

 

N’avètz aquí l’audio en cas que los de ràdio Lengadòc siagan a la ramassa!

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.