Compreni pas tot…

Las èrsas de las informacions se desforrèlan, se desforrèlan e se desforrèlan sus nosaus e avèm pas totjorn lo temps de comprene çò que se passa.

– Ligombau : La familha reiala d’Anglatèrra a pas lo dreit de manjar cauquilhatges, ustras, muscles,… de paur d’èsser malauts. Aquò los empacha pas de tastar e presar lo ligombau blau…

-Alh : La familha reiala d’Anglatèrra a pas lo dreit de manjar d’alh ! Question de buf…

– Eleccions : A unas eleccions presidencialas passadas d’Azerbaidjan, un responsable oficial de la comunicacion s’enganèt e difusèt la resulta la velha de l’escrutin.

– Malfatan : Mai ten de problèmas amb la justícia, mai l’ancian president Trompeta reçaup de sostens financièrs… Coma un potz sens fons…

– Cervesa : En Eslovaquia, un candidat populista avancèt coma argument mobilizator qu’Euròpa voliá aumentar lo prètz de la cervesa ! Aquí un que vòl pas metre d’aiga dins son vin (son vinagre?) !

– Petard : Cal èsser mai piòt qu’un piòt per lançar un petard per las cambas del gardian de l’equipa advèrsa ! De mai, son equipa ganhava ! (De tot biais, cal pas escampar petards o que que siague suls jogaires : crits – sens injúrias — e picar de las mans sufison).

– Ecologia : Òsca a l’associacion ecologica que mena l’accion contra la betonizacion d’airals agricòlas en vista de l’implantacion d’una basa logistica a Carcassona. Comprenèm pas que l’accion passe per l’empegatge d’afichas de crida a la manifestacion suls panèus en occitan de dintrada de la vila. Argument balhat : coma son dejós, son mai a nautor !!! De trabalh encara per ligar diversitat ecologica e diversitat linguistica !

– Atal-at(t)al : Ja que lo sistèma d’ensenhament trantalha bravament en França, vaquí que causisson pel Ministèri de l’Educacion un ministre que va faire las causas atal-attal ! Aquò promet !

– Marseillaise : Abans cada partida dels Dragons catalans, se canta e se repren en còr Els Segadors. Alara, perqué unes espectators se botèron a cantar la Marselhesa per una formacion de Dragons compausada de catalans, d’occitans, d’angleses, d’australians, de fijians e tongians… Vertat qu’en sosten a unes moments a la sòno passan Bella Ciao…

– Patois : Al castèl de Villers-Cotterets, ont se celèbra d’ara endavant la lenga francesa e son raionament intenacional capitan de metre en evidéncia lo mot de « patois ». Òm sap pas tròp de çò qu’an dins lo cap entre trufariá, bestiesa, ignorància, provocacion,…

– Anglicizacion : Lo pòle universitari que se dobrís a Carcassona permet a la Comuna de faire afichas per anonciar l’espelida d’aquela « University » !!!

– Cinc minutas : La durada de las informacions en occitan lo dimenge sul còp de set oras del ser sus França-3-Occitania. Lo temps de dire bonjorn e adissiatz…

••• De seguir las pichonas causas de la vida vidanta, lo cronicaire manca pas tanben d’èsser al fial de l’anar del monde e de constatar amb plan de tristesa e d’amarum que los falquets demòran plan mai fòrts que las colombas.

Incomprès Roch