Eric Astie

 

Una cronica de l'Eric Astié, per parlar  un pauc de tot... e de tot un pauc!

Curioser

LOS ACÒRDIS TOLTÈCAS (2)

 

Adishatz monde de Ràdio Lenga d’Òc e adissiatz plan.

Los quatre acòrdis toltècas venon del Mexic ancian. Son de conselhs de biaisses de viure que, se los aplicam nos melhoran la vida. Simples -çò que vòl pas dire de bon far-, s’apèvan sus de bon sens e una vision sanitosa de la vida e dels rapòrts socials. Vejam los dos primièrs acòrdis.

 

          Acòrdi primièr : "Onora çò que dises"

          Los mots son magics. Pòdon fòrça. Una paraula, quitament parauleta a lo poder de congrear bonastre o malastre. Son d’armas de talh doble : los mots capitan de sedusir, garir, afligir, doler…

          Crean d’estats de consciéncia, que, a lor torn, determinan nòstras pensadas que se manifèstan dins las resultas qu’obtenèm.

          Aquò’s lo lengatge qu’utilizam que faiçona nòstra representacion del mond.

          Idèas, desiranças, objectius, intencions, relacions, ligams e engenhs, absoludament tot se manifèsta per de paraulas.

          Pòdon portar de benfaits immenses a l’Umanitat o èsser d’aisinas de destruccion capvath lo pes de la paur, del ressentiment, de la frustracion, de la colèra e de las opinions malvolentas.

          Los mots son luènh d’èsser innocents, son totjorn portaires de sens.

          Onorar çò que disèm, aquò’s canalizar lors poders d’expressivitat d’un biais constructiu e positiu. Venèm çò que disèm e pensam.

          Com integrar aquesta paraula impecabla ?

  • Parla mens e agís mei
  • Vè mei enlà de las toas espèras quan t’engatjas
  • Sias atentiu a çò que pensas
  • Escota 70 % deu temps e parla sonque 30 %
  • Esfòrça-te d’estar mei precís dens lo ton lengatge entà exprimir eficaçament totas las toas idèas, atau que’n seràs melhor comprés.
  • Bandís tota comunicacion agressiva de la toa vita.

 

          Acòrdi segond : "No’n fagas pas un afar personal"

          La màger part del monde pensan que tot çò qu’escai es orquestrat per eles, que siá a lor benefici o contra eles.

          Quand tot va plan, i pas de problèma major : tot se debana sense dificultat. L’afar se complica quand avèm l’impression que tot çò nos escai, que los eveniments del mond e nòstre ròde son contra nosautres.

          Magina alavetz çò que se passa ! Es coma se lo mond entièr se descadenèsse contra tu. Çaquelà, aquò’s l’ego que congrèa colèra, frustracion e un agotament emocional prigond, per amor temptas de lutar contra las opinions e las situacions que te pòdon empoisonar l’existéncia.

          Non se tracta pas aicí de zo acceptar tot sense te daissar pertocar, mas puslèu de compréner que lo problèma arriba quand daissas tas emocions gafar lo fòrt = aver l’avantatge.

          Escotar e creire sistematicament tot çò que los autres dison sus tu, es coma engolir de poison volontariament cada jorn.

          Lo fait de zo personalizar tot es a l’origina de mantunas sofrenças, per amor avèm tendéncia a èsser ipersensibles a tot çò que lo monde dison o fan a l’entorn de nosautres.

          Préner las causas personalament nos rend vulnerables als predators.

          Zo sabes ara : en adoptant una perspectiva mai larga sus las situacions e los problèmas, pòdes defugir de t’implicar emocionalament e quitar d’èsser pertoca.t.da per l’agitacion exteriora.

 

Com integrar aqueste destacament a tot çò qui t’enròda ?

  • Apren de las diferéncias deus autes, integra e respècta las lors decisions
  • Compren que l’auta gent es un individu dab los sons problèmas pròpis, las soas creséncias e dificultats pròpias.
  • Se quauquarren te destorba, tròba un espaci benparat e alenga-te clarament.
  • Ensages pas d’impausar los tons desirs a las opinions deus autes
  • Pensa tostemps au ben comun, en tota circonstància
  • Guarda-te de víver segon lo ton ego : apren la compassion, l’umilitat, l’escota atentiva e l’obertura d’esperit entà víver experiéncias mei enriquidoras. Aquerò te portarà mei de serenitat dens tots los aspèctes de la toa vita.

 

La seguida lo còp que ven !

 

Adissiatz plan e prenètz suènh de vosautres.  

a close up of some flowers