Legendas, istòrias a l'entorn dels Sants
Legendas, istòrias a l’entorn dels Sants
Acabem aquelas passejadas dins los nòstres vilatges « Sants » dins de luòcs ont legendas e contes son nombroses. Comencem per St Joan de Fòs, e las terralhas vernissadas verdas, lo musèu « argileum », lo Totèm « Lo Picart » e las legendas : las cogordas escais-nom balhat als estatjants del vilatge, una legenda plan vièlha. Mas subretot las legendas del Pont del diable e de la Cauna de Clamosa. Se trapa fòrça versions sus aquelas 3 legendas …
Ara cap a Sant Guilhem dau desèrt ! L’una de las meravilhas de la nòstra region ! Fondat per Guilhem de Gelòna, comte de Tolosa e d’Aquitània, l’abadiá es visitada per milèrs de toristas… Evocar lo patrimòni e las legendas de St Guilhem, prendriá paginas e paginas del nòstre jornau. Mas ensajatz de vos assabentar, documentar !
Autre vilatge amb animal totemic, Sant Andrieu de Sangònis e son pòrc negre, que foguèt eligit cònsol malgrat el ! (de veire la legenda). Ara direccion Montpelhièr, traparem Sant Pau e Valmala En trenta annadas, lo vilatge a vist la populacion mai que doblar passant de 593 estajants en 1990 a 1310 en 2020, l’atraccion de Montpelhièr coma se ditz! Mas la garriga a l’entorn del vilatge permet d’oblidar la vila e de somiar un pauc…
Acabarem lo nostre periple, amb dos vilatges los plus a l’èst, Sant Baudèli de la Silva e Sant Pargòri on lo cagaròl es lo rei!
Vaquí las nòstras passejadas dels Sants acabadas, benlèu que ne volètz saupre mai ? Vos podètz anar assabentar dins los O.T de còr d’Erau, e per las passejadas d’a pè, ML a editat un brave MIDI BALADES HERAULT .
Zon, al còp que ven !
0 commentaires