Reviscòl e idèias vièlhas

• Es un classic dels partits politics de preparar los endemans que cantan en parlant de reviscòl e de renaissença. Es çò que nos fa, per exemple, dempuèi quauquas annadas lo partit macronista.

D’unas formacions son mens conegudas e s’acontentan de pinturlejar parets e panèus publicitaris, d’empegar afichas e pegasolets. Quala foguèt pas nòstra suspresa del costat de Carcassona de descobrir inscripcions signadas : Novelum. De qué se passava ? Las tropas de l’IEO de Dordonha https://www.novelum-ieo24.fr, menadas per un rèire-filh de Bertran de Bòrn e armadas de pèiras agudas, se serián lançadas a la conquista (o la reconquista) dels terradors lengadocians ? Pro qu’agèsson fait seguir trufas negras, patanas sarladesas, fetge gras, tiron confit, cabecons, castanhas e noses, vins de Monbazillac e de Brageirac, e tanben las òbras completas de Micheu Chapduèlh e de Joan Ganhaire, sèm prèstes de los aculhir e, puslèu que de pintrar sus las parets, pintarem.

Mas aquí, paure monde, arrèsti la colhonada. Novelum ? Tal es lo nom que s’es balhat un grop de l’ultradreita (los que pensan que lo Recampament nacional es d’esquèrra) que se definís coma nacionalista e identitari e qu’explica que lo nom significa en lengadocian : reviscòl. An un eslogan plan susprenent : Volèm viure al país ! (Mas, vos demandi, qun país ?). Per logo : sus fons de crotz occitana, l’anhèl pascal del blason de Carcassona (manca lo fons de flors de liri), que pòrta una berreta basco-bigordana tot en brandissent un auriflam de la crotz celtica ! Lo 11 de novembre, pintrèron que se caliá rebrembar dels peluts que defendèron França (pas dins l’esperit del Claudi Martí que met aquelas paraulas dins la boca del paure soldat desconegut :  « França, som mòrt a tas guèrras / Rocroy, Verdun e Rivoli / Mòrt per pas res, plan mòrt, misèria /Per Loïs Catòrze o Galliéni. »).

Darnièra aficha vista : Français, tu es ici chez toi : réveille-toi ! Bon, aicí, ieu cresiái puslèu que los franceses èran venguts en Occitania, non ? E que los endormits, serián puslèu las occitanas e los occitans. Sus aquela aficha, un grop d’un autre bòrd a pegat un papafard d’una autra mena que ditz que las frontièras assassinan.

• Sus la placeta de darrèr l’ostal, sus la placa del distributor de saquets per amassar las cagadas dels gosses, qualqu’un-a a plaçat un pega-solet de l’Action française.

Deviscolat Roch