Formigueta 2026 (3)

par Formigalh Roch

Formigueta 2026 (3)

Sabi plan que trefosissètz per saupre la fin del raconte. Me desencusi, mas Jornalet a pas encara tornat inventar lo fulheton quotidian, coma al temps d’Alexandre Dumàs, Onorat de Balzac, Juli Vèrne o Maurici Leblanc…

Aprèp aver lisat sul glaç e s’èsser copada la cambeta lanceta, la formigueta rescontrèt lo solelh, la nivol, la paret, la mirga, lo gat, lo bròc e lo fuòc. Li cal anar ara veire l’aiga.

• Episòdi 8: L’alga

La formigueta s’acerquèt de l’aiga d’una font, d’un pesquièr o d’un riu d’aiga fresca. Çò diguèt: « Aiga que siás fòrta d’atudar fuòc, fuòc de cremar bròc, bròc de… (etc) ». Mas l’aiga li respondèt: «T’enganas pichona formigueta, corrissi mas la vaca que me beu es plan mai fòrta que ieu!»

• Episòdi 9: La vaca

La formigueta trapèt la vaca dins lo prat. Mas quand siás una pichona formigueta, una vaca es per tu un mostre grandaràs. En trigoçant sa cambeta lanceta, montèt long de la pata de la vaca per li demandar ajuda. Li parlèt a l’aurelha, mas la vaca somiaira e romiaira l’ausiguèt pas. Acabèt per anar dançar dabans los uèlhs de la bèstia que, fin finala, s’apercebèt qu’èra pas un moscalhon que l’entantarinava. La vaca escotèt doncas lo pregària de la formigueta que li estipulèt: «Vaca que siás fòrta de beure aiga, aiga d’atudar fuòc, fuòc… (etc)». Mas la vaca li respondèt : «T’enganas, pichona formigueta, soi pas la mai fòrta. Me veses atal plan quièta, mas sabi que lèu vau morir. Soi pas mai una vaca que ritz, mas una vaca que plora… Patissi de la Dermatòsi Nodulària Contagiosa e lèu lo veterinari me vendrà faire una piqura per me mandar al paradís de las vacas dins las pradas ont l’èrba es totjorn verda e ont se vei passar cada ora un trin que fa tu-tu-tut! »

• Episòdi 10: Lo veterinari

La formigueta trapèt lo veterinari e li diguèt: « Veterinari que siás fòrt de mandar vaca al paradís, vaca de beure aiga, aiga… (etc)». Mas lo veterinari diguèt a la formigueta: « Veses, insècte de la pata garrèla, es pas uèi que vau anar faire la piqura a la vaca de la prada verda qu’una barricada de membres de la Coordinacion Rurala m’espèra e que me vòlon acalhaussar. Non, paura formigueta, soi lo mai fòrt de res de res!»

• Episòdi 11 : La remontada

(Es atal: dins un conte-passejada, a un moment, tornas partir dins l’autre sens).

Alara, quand la vaca aprenguèt que lo veterinari vendriá pas, se diguèt : «Me soi tibat lo ventre d’èrba; ara, me vau agoludar d’aiga ».

Quand l’aiga vegèt arribar la vaca, se diguèt: «Vòli faire quicòm d’utile abans d’èsser engolida per la Margarida, vau anar atudar lo fuòc!» e sautèt emplenar lo camion dels pompièrs.

Quand lo fuòc ausiguèt arribar los pompièrs, se diguèt «Pòdi res contra l’aiga propulsada pels tudèls dels pompièrs; mas, a i èsser, vau faire un acte simbolic: cremar aquel polit bròc que deu èsser de garric!»

Quand lo bròc vegèt lo fuòc se ronzar sus el, se diguèt: «Missanta limonada! Vòli morir al camp d’onor: te vau metre una repassada de primièra a Raminagrobís que noirirà ma legenda dins los sègles dels sègles!»

Quand lo gat vegèt arribar lo bròc, se diguèt: «A prene una repassada, autant se la meritar: te vau crocar la mirgueta, çò que farà plorar las drolletas e los drollets qu’escotan aquesta istorieta!»

Quand la mirgueta vegèt arribar lo gat, metèt en branle sas ratonetas supersonicas, acabèt lo trauc dins la muralha e passèt de l’autre costat.

• Episòdi 12: Per un trauc de mirga

Per aquel trauc, lo gat pesuc poguèt pas passar, mas lo vent, el, dintrèt, traversèt e sortiguèt amb plan de vam; aquò li permetèt de butar la nivol. Un solelh en majestat apareguèt dins lo cèl. De la calor de sos rais, faguèt fondre lo glaç. Tanben, mercé a l’elioterapia, sonhèt en un res de temps la cambeta lanceta de la paura formigueta qu’aviá lisat sul glaç. Mas quand la bestiòta arribèt al mercat, fasiá temps que los mercands avián plegada botiga.

Alara, la formigueta s’entornèt a l’ostal, telefonèt a Bebèrt lo pic-e-repic que li liurèsse al mai lèu una pizzà.

La formigueta es coquineta

Mangèt totas las miquetas

E me daissèt pas res

E cric la cambeta, e crac la pizzeta

lo Conte de la formigueta es acabat!

• Episòdi 13: Formigueta, papeta, mameta, berreta, casqueta e pantofletas…

Lo papeta formigueta pòrta una berreta

La mameta formigueta pòrta una casqueta

papeta casqueta formigueta berreta mameta

Al cap de las sièis cambetas de la formigueta son pantofletas

Lo papeta formigueta pòrta una casqueta