109 – Cagadas

Diga ! La darrièira de l’estiu en Menardia-sus-Òrb : van cercar la mèrda. Aquò, me diretz, es pas novèl mas aqueste còp la vòlon espepissar menimosament e los chins que se passejaràn dedins Besièrs deuràn presentar, en cas de contraròtle, sa carta d’identitat ADN per provar que son pas eles qu’an perdut quicòm dins la gandòla. As plan ausit ! Ton chin fichat au grand banditisme, fòto de cara e de perfil, emprenta de son vintenat de coissinets e analisa de l’escupinha per clavar lo passapòrt genetic. Siaguèsses l’aürós proprietari d’un bastardon o d’una raça forastièira a la tolerància menardenca, ton chin serà pas mai qu’un chin sens papièrs enebit de territòri biterenc. En mai, m’an fotut la botiga de l’IEO en plen mitan la zòna de nauta securitat que sèm pas luònh dau ponch zèro : lo burèu de Ro-ro, de Be-bèrt a la Comuna… Adieu practica catalana fortunada e sos gosses indesirables, la quincanèla de l’IEO es per deman…

Rai, me poirai reconvertir sens pena. Lo plen emplec es per deman en riba d’Òrb ! I aurà de qué s’ocupar : entre las brigadas municipalas de contraròle a la frontièira merdansona, los tecnicians de prelevament adn, los amassaires de cròtas que faràn lo  trepador de long en larg en cèrca lo graal merdós que los farà ben veire de son patron, sens te parlar dels analisaires de cagas pagats una fortuna dins los laboratòris de la vila, dels frigos d’estocatge de las donadas perfumadas o dels ordinators que caudrà ben faire marchar.

Vòls que te diga ?  Aquí una mesura que pudís qu’enfalena, e qu’en mai serà salada que salada. An que de li pagar a Menard una petarèla-amassa-cròta de fonccion que me faga lo davant de pòrta quand monta a la Comuna per trabalhar, e…rau !!

Enfin, es çò que ne dise, ieu…

La guinhada de l’IEO34. E, rau !