E tot aquò val lo còp ?

• Un còp, dos còps, tres còps : disiá qu’èra pas gaire ! Un còp, dos còps, tres còps : disiá qu’èra pas pro ! E quand ne sèm a 28 CÒPs, de qué nos demòra de dire ?

• Òrdre del jorn : Las discutidas d’una CÒP consistisson a s’avisar que los engatjaments preses a la CÒP passada son pas tenguts e que ven urgent de prene novèlas mesuras que se poirà constatar a la CÒP seguenta que son pas aplicadas.

• L’art de la paraula : Tot l’art del discors es de faire una presentacion generala amb d’objectius bèls e planetaris tot en botant en resèrva la possibilitat per son país de faire en realitat  çò qu’a plan enveja e que serà bon per l’economia. Per l’ecologia, veirem plan un autre còp…

• Estonats : De segur, demoram petròli suls engatjaments per l’an pebre de sortida de las energias fossilas.

• Visca la democracia : Aprèp aver dit bye-bye a Dubai e a son tan brave emir, la CÒP 29 se tendrà dins un país democratic que ven de faire mòstra de son biais d’assegurar la patz territoriala e l’amistat amb los vesins mas que ten petròli (çaquela) : direccion Bakó en Azebaidjan.

• Intelligéncia asimutada : Dos vinhairons audencs an fisat l’elaboracion de lor vin a la famosa (??!!!) Intelligéncia Artificiala. La brava obrièra anèt fins a dessenhar l’etiqueta e causir lo nom de la tinada. Paura destinada : la sonèron… The end !  Probable per marcar la fin programada de la viticultura ?

• Pas de Nadal pels occitans : Dins las disparicions programadas dels temps de fèsta, se trapa la non-difusion de Viure al país per Nadal e Cap d’An. Las fèstas son interditas en lenga nòstra ! Los ancians se sovenon que dins lo temps aquel periòde èra l’objècte d’emissions especialas que se fasián amb mai de mejans… 

• Penuria d’ensenhaires : Ven d’èsser publicada la tièra dels pòstes als concorses de recrutament de professors del segondari per l’occitan : CAPES : 3 ; CAFEP: 1 ; Agregacion : 1. Pauròts, brave monde, aquò cobrirà pas los besonhs que demandariá l’ofèrta generala de l’ensenhament de l’occitan. Aquò pausa una autra question grèva : es que i aurà pro de candidat-a-s per obrar al salvament de nòstra lenga ?

• Francés obligatòri : Los basques, amb unas bravas manifestacions, se son obtengut lo dreit de passar espròvas del brevet dels collègis en euskarà. Los servicis de l’Educacion « nacionala » remeton pas en causa aquel dreit mas vòlon impausar, al nom de l’egalitat entre los/las candidat-a-s, la fornidura dels subjèctes unicament en francés  La vertadièra egalitat es pasmens que la lenga del subjècte e la de las responsas siá la meteissa !

• A taula (o : Passatz vòstre camin!) : Vist un novèl restaurant del centre de Carcassona que prepausa un caçolet… vegan. 

• Indians col(h)onizats : Avèm ja saludat dins aquesta cronica los sostens del TFC, los Indians, que mancan jamai d’interpretar lo Se Canta. La direccion americana del club a plan comprés lo messatge e lo besonh d’enrasigament dins lo territòri. Atal, tota la contrada es cobèrta d’afichas que dison : TFC : All we want for Christmas is you !

Copista Roch