Neandertalissimo !

 

Diga ! Sètz debonorièrs o colcatards ? Segon un estudi tot çò que i a de mai seriós vòstre relòtge biologic vos pòt dire se vòstra rèire-rèire-mameta rança omo-sapiens se daissèt menar dins un bartàs per far un enfant de garrolha amb un òme de neandertal. Dison, los sabentasses, ajudats per d’intelligéncias artificialas e molonada d’ordinators que mai avètz de gèns neandertalians e mai d’ora vos levatz. Sembla pas de bon, aquò.

Ja nos enfumèron d’annadas a de reng en nos ensenhant dins sas escòlas, quand èrem pichotets, que papeta dau cròs de Manhon aviá pas fringat, e vice-versà, amb las majoretas de la bauma dau costat de Neander. Emai nos afortissiam a l’epòca que s’èran pas solament crosats. Puòi admetèron que lo Neandertal tardiu auriá benlèu encontrat au Mamot la Cro-minhòta que veniá quèrre lo manjar mas precisèron qu’èran geneticament pas compatibles. E ara te venon dire que se seriá debanat probablament un eveniment principal d’ibridacion… Entendètz que non contents de jogar a pipa-redòla dins la bauca, pichonèron amassa per engendrar ton con de vesin, lo caçaire, aquel que partís a las clicas e que fa jaupar jos ta fenèstra son ardada de quinze chins dins lo temps que pòt pas amodar lo C15.

Vòls que te diga ? Nautres los avèm pas jamai creseguts. Pasmens nos dobtàvem que lo mond d’Aude escaissats amistosament mas plan justament « las tèstas platas » presentavan caracteristicas incontestablas que los ligavan a de davancièrs d’aquela branca bestòrta. Basta sonque d’agachar la fòrma de la clòsca en balon de rugbi….

Mas d’aquí a apondre a sa cosinalha totes aqueles que se sofrisson pas au lièch tre que puntejan las aubetas, es saique un pauc quichat non ? E d’autres sabentasses d’una autra capèla meton tanben dins la saca de l’eretatge de papeta neandertal los rossèls o los qu’an lo nas un pauc fòrt… Aquò fa de mond, macarèl ! Aquò fa de mond…

Bon per çò de ieu, vos rassegure, siái pas estat oblidat a la distribucion, mas es lo nas qu’a tot pres. Pauròt ai pas finit de montar lo revelh…

Enfin, per çò que ne dise…

 

La guinhada de l’IEO34. E, rau !  

 

 

low angle photo of concrete bridge

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.