De qué li volètz a Platon?

Se pòt pas dire que siague un grand especialista en filosofia. En Terminala C, a l’Escòla Normala de Carcassona, aviam cors de filosofia lo diluns de matin. Lo professor èra de Limós. Aquò mancava pas: al cap de cinc minutas, l’un o l’autre (dels normalians) lançava, l’aire de res, dins la discutida: « Son pas estat tarribles, Limós ièr………! ». e aquí, èra partit duscas a la fin de l’ora. Parlèrem mai de Lacans que de Lacan ; vaquí perqué me trapi dins un sentiment de legitimitat prigonda per redigir aquesta cronica perpensada sus la vida, las òbras e los actes d’unes filosòfes d’un còp èra.

(Francament -e tanplan, occitanicament-, se seguissètz corses de filosofia, vos val mai escotar vòstres professors e vòstras professoras que de legir aquesta cronica!)

La Grècia dels filosòfes

- Lo Diogèna causiguèt per ostal un barral de cartagèna.

- Sofòcle portava binòcles.

- Demostèna desmontava las antènas.

- Aristòta, filosofia per aristocratas.

- Teofrasta partiguèt en escorreguda long de l’Eufrata.

- Epicura jamai sortissiá de taula.

- La maire d’Epicura èra infirmièra.

- Pitagòra parlava per teorèmes.

- Callifon auriá plan volgut èsser calife.

- Socrata escupissiá pas sul picrata.

- Socrata, gratussa-te ont te grata!

- Val mai èsser d’Atica per seguir la pensada socratica.

- Qual-a compren la dialectica pòt seguir la pensada socratica.

- Ipocrata? Un brave ipocrite!

- Xenofòn èra un mèstre per jogar del xilofòn.

- Quand de còps Democrita se faguèt portar a las eleccions?

- Gorgiàs nadava dins los gorgs.

- Isocrata dessenhava triangles isocèls.

- Euclida trabalhava coma geomètre: ba mesurava tot!

- Eratostèna colleccionava las tostènas.

- Ptolémaïs èra un mèstre-cosinièr dels mesturets!

- Platini es al fòbal çò que Platon èra a la filosofia.

- Plutò èra un eròi mitologic per Platon.

- Un amor platonic es pas mai qu’una amitat difusa.

- Lo Platon èra pas plan tonic.

- De qué diguèt lo Platon de las placas tectonicas?

La Roma dels filosòfes

- De renècs en renècs, avançava la pensada de Senèca.

- Ciceron te preparava un omòs de primièra.

- Epictèta colleccionava los epitètas.

- Lucrèce èra puslèu materialista.

- Val mai Plutarca que jamai.

- Quintus Junius Rusticus cantava Le petit Quinquin a plèc de gargalhòl.

- Zarmanochegas voliá fotre lo fuòc al país.

- Macròbe, confondut amb Micròbe, foguèt pas reconegut coma grand filosòfe.

Filosòfes medievals

- Abelard cerquèt Eloïsa long de sa vida.

- Ibn Rochd de Cordoa-Averroès, la dobertura d’esperit.

- Ibn Sina-Avicenne filosofia e alquimia, medecina e astronomia.

- Boèce revirèt Aristòta e decimalizèt las chifras.

- Maïmonida demandèt jamai mai de moneda.

- Tomas d’Aquin, una quinta-flòch!

Anem, destapa-me aquesta cantina de vin roge de Menerbés Filosofia e parlarem filosofia fins al cap de la nuèit!

Filomèn Roch

PS1: Avèm reçauput una letra vindicativa del Comitat anarco-occitan Loïsa Miquèl que denóncia l’amalgama fait entre Marina Le Pen e la militanta anarquista dins lo Papieròt passat: amenaça nòstre cronicaire de li faire faire Sant-Miquèl per dire d’arrestar sas elucubracions en s’amagant darrèr la libertat d’expression, en referéncia marcada al discors fascisant d’En Vance a Berlin. Lo jornal ten clarament a portar son sosten a nòstre collaborator e precisa que la possibilitat d’escriure asenadas e frasas bufècas es un dreit inalienable e imprescriptible de la deontologia jornalistica.

PS2: La direccion del Jornalet ten a portar a la coneissença dels legeires que lo PS1 fa part integrala de la cronica del signatari e engatja de cap de biais sa responsabilitat pròpria. E qu’aquò vos empache pas d’escotar L’Eissarpa de fuòc cantada pel Joan-Pau Verdièr...