Gerard Gouiran, nòstre collèga, amic, professor de mantun.a de nosautras e nosautres, fidèl aderent del CREO Lengadòc – e mai un còp retirat – nos a quitats aqueste 14 de mai.
Trabalhaire acarnassit, bailejava la Revue des langues romanes e aviá fondat, a las PULM, la colleccion « Estudis occitans ». Sota sa direccion, la colleccion s’èra dubèrta amb las òbras de Guilhem IX, e el aviá editat aqueste recuelh d’Albas del títol tan bèl : E ades sera l’alba / Angoisse de l’aube. Sa bibliografia impausanta a renovelada la compreneson dels tèxtes medievals, dempuèi son primièr obratge consacrat a Bertrand de Born, grand mèstre del sirventès, fins a la recenta edicion collectiva del Thalamus de Montpelhièr, que li consacrèt mantuna annada de trabalh, e mai foguèsse ja endecat per la malautiá.
Dempuèi la parucion de la novèla, arriban de messatges d’ancians estudiants, totas generacions confondudas, d’aqueste departament d’occitan de nòstra Universitat qu’aviá creat. Mai d’un.a son venguts, a lor torn, professors, per part titularis d’aqueste CAPES obtentut a la fòrça de l’engatjament, CAPES que ne foguèt lo primièr president.
O sabiá, Gerard, que la reconeisséncia institucionala de l’occitan e dels ensenhaires d’occitan passa a l’encòp per l’exigéncia scientifica e per l’engatjament militant. S’engagèt, el, dins l’administracion de l’Universitat, dins lo SNESUP/FSU, dins l’IEO de las annadas 70-80…
Aviá, Gerard, una idèa nauta del servici public que li aviá permés, el, l’enfant d’un mitan modèste, d’integrar l’Escòla normala superiora e de venir professor de las Universitats. A totes, professors o agents administratius, portava un respècte e una consideracion identics. Aquesta idèa nauta del servici public fasiá qu’en defòra de son mestièr, organizèt e animèt d’escòlas occitanas d’estiu, intervenguèt dabans d’escolans de licèu, que lor presentava amb finesa e passion l’òbra dels trobadors.
Sul campus, li devèm tanben los noms de salas amb d’autors occitans, de Camprós als Felibres roges en passant per Max Roqueta e maites encara.
Totes sos ancians estudiants son unanims per dire son exigéncia intellectuala qu’anava amb son sens de la pedagogia, son socit de la clartat, sa generositat. Se remembran tanben, coma nosautres, de son umor. Los que son estats de sos escolans o de sos collègas pòdon testimoniar d’aquesta generositat e mai de sa detestacion de la demagogia : donava de son temps sens comptar, mas fasiá pas de concessions sus la qualitat de çò qu’esperava.
Segur que sèm tristes d’aquesta pèrda, mas nos devèm de seguir lo camin, en memòria d’el, que sabiá plan que, per l’ensenhament de l’occitan, res es pas jamai aquesit.
Maria Joana Verny
Gérard Gouiran a durablement marqué les études occitanes. Travailleur infatigable, il dirigeait la Revue des langues romanes et avait fondé, au sein des PULM, la collection « Estudis occitans ». Sous sa direction, la collection s’était ouverte avec les œuvres de Guilhem IX, lui-même éditant ce recueil d’Albas au si beau titre E ades sera l’alba / Angoisse de l’aube. Son imposante bibliographie a apporté une compréhension renouvelée des textes occitans médiévaux, qu’ils soient lyriques, narratifs ou non littéraires. Nous citerons notamment son premier ouvrage, l’édition de l’œuvre du troubadour Bertrand de Born, grand maître du sirventès, ainsi que la récente édition collective du Thalamus montpelliérain, à laquelle il a consacré de nombreuses années de travail acharné, alors même qu’il était déjà très affaibli.
Tous ses anciens étudiants louent unanimement son exigence intellectuelle qui allait de pair avec son sens de la pédagogie, son souci de la clarté, sa générosité, son ouverture. Ils se souviennent aussi, comme nous, de son humour parfois grinçant. Depuis la parution de la triste nouvelle, les messages affluent sur les réseaux sociaux : anciens étudiants, toutes générations confondues, depuis les années 80 à Aix où il a commencé sa carrière, jusqu’à ce département d’occitan de notre Université qu’il avait créé, comme il avait créé notre licence LLCER.
Nous tous, qui avons été, au moins en partie, de ses élèves et de ses collègues, nous pouvons témoigner de cette générosité qui allait de pair avec sa détestation de la démagogie : il donnait de son temps sans compter, mais ne faisait pas de concessions sur la qualité de ce qu’il attendait de nous.
Aguère l’astre d’encontrar Gerard, au CREO de Provença e a l’Escòla occitana d’estiu. Foguèt e demòra per ieu lo modèl dau militant occitanista e dau saberut liure, totjorn disponible.
Adieu l’amic.
Camelio Alan