Despossessions

Vaquí qu’unas comunas de Tarn se vòlon toscanas coma argument toristic e de promocion. Lor i sufís pas d’èsser se ? Perqué s’anar inspirar endacòm mai en plaça de metre en abans l’istòria locala e occitana ? Una idèia dels oficis de torisme de Galhac e Còrdas ! Los vinhairons de Galhac van cambiar de vitatges per poder comercializar de chianti ? Lo sangiovese remplaçarà lo fèr-servador ?

Cal dire qu’aquò ven de luènh : l’idèia es pas novèla-novèla ! Se poiriá avançar qu’es la represa d’una tradicion medievala occitana !Al còr de l’edat-mejana, l’espelida de las bastidas se faguèt en referéncia a vilas forastièras : Granada, Còrdas, Florença, Colonha, Tornai, Pavia,… Fa temps ja que lo Martègue es una Venècia provençala… Per faire bona mesura, Castras seriá la Venècia de Tran !

I a pas solament lo còp de bòta italian ; se trapan tanben las còrnas espanhòlas… Dempuèi lo sègle 19, unas contradas d’Occitania se veson espanhòlas en festejant las corsas de taure. Fa quauquas annadas se multiplicavan, al nom d’aquela falsa tradicion, manifestacions nomenadas ferià dins lo temps ont se daissa desaparèisser los carnavals e autras fèstas tradicionalas. Val mai saupre dançar lo flamenco que lo rondèu o la borrèia : faràs mai… autentic !

L’exotisme trapa tanben plaça quand s’agís de nomenar carrièras, ont se doblida gaujosament los toponimes locals per balhar nominacions fantasierosas. Dins un tèxte que mandèt la setmana passada, Pascal Ratineaud parla d’aquel vilatge del Pargue Natural Regional Lemosin-Peiregòrd ont an decidit de balhar noms d’arbres a las carrièras http://occitan.blogspirit.com/archive/2023/06/14/quo-s-eschaura-per-patric-ratineaud-3344210.html . Atal, dins lo respècte e la valorizacion del patrimòni local, podètz abitar una carrièra « daus citroniers », daus « cocotiers », daus « grenadiers », daus « eucaliptus », « mandariniers », « abricòtiers » e quitament daus misteriós « parasoliers » e tanplan daus bananiers. » Estapa seguenta : desrabar los chastanhièrs ?

E vos parli pas d’una comuna d’Auvèrnhe ont s’es causit de balhar res que noms de cantaires a las 48 carrièras ! Vos cal pas creire que siaguen noms de trobadors, de felibres o de cabretaires , … Pas de carrièra Pere d’Alvernhe, Na Casteloza, Pons de Chaptuèlh o Cantaloba… Non, podètz viure dins una carrièra Johnny Halliday, Celina Dion, MC Solar… E aquò, aprèp una consultacion populara…A te faire pèrdre l’enveja de canturlejar o de fiulejar https://www.europe1.fr/societe/johnny-hallyday-celine-dion-cette-commune-dauvergne-donne-a-ses-rues-des-noms-de-chanteurs-4149860 !

Despossession tanben plan grèva que contunhan de ne patir los pòbles d’Amazonia. Lulà aviá promés, creat un ministèri especial pels pòbles autoctònas, delimitat 6 novèls territòris  https://www.france24.com/fr/amériques/20230428-au-brésil-lula-décrète-légales-six-réserves-indigènes-une-première-depuis-2018 mas l’òm se trapa ara amb projèctes de lei per remetre en causa las delimitacions dels territòris indigènis. La deforestacion contunha son òbra. Los caps mediatics pòdon multiplicar los viatges per explicar la situacion, la realitat demòra trista e angoissanta.

Situacion preocupanta tanben al Peró ont una novèla proposicion de lei met en dangièr Amazonia, mercé a unas atacas bèlas contra los pòbles autoctònes isolats. Los responsables dels pòbles vòlon empachar aquela votason e lançan una crida a la Tèrra tota per arrancar una decision positiva. 

https://secure.avaaz.org/campaign/fr/stop_the_piaci_bill_loc/?bfVbVdb&v=148940&cl=20550711336&_checksum=166072628362fbc11d63926c38fd7251c0de78e056910b077a85a58fad6638ce

E nosaus, aimariam plan de saupre ont ne sèm e ont anam per la delimitacion d’Occitania !

Despossedit Roch