Es la davalada! La nuèch pren lo poder. Poder magic? Mesa en relacion amb los mòrts, òbras ritmadas per las sasons, cresenças, paurs, del fons de ma memòria, vaquí que ressorgís aquel passat, pas tant alunhat.

Martror! lo 1èr de novembre: debuta d’una annada novèla, debuta del temps escur! Se raprochar dels mòrts! ont es la frontièra entre la nuèch sus tèrra, la nuèch de las tenèbras?

«Dança amb los mòrts», dança amb nòstras paurs, nòstras angoissas!

Las paurs entretengudas per las religions, las supersticions e las cresenças, an engendrats legendas, contes, provèrbis e dichas pendent sègles. Nombroses noms de luòcs en Occitània ne testimònian: cauna de las fadas, riu del Drac, pont del diable, e totes los toponims amb lo mot mòrt … Martror aviá son cortègi de dichas e provèrbis. De «contractes» se fasián de «Martror a Martror». «De St Miquèl a Martror, i a un mes laborador». Caliá far lo trabalh abans la dintrada dins la «sason negra»!

Los rituals mancavan pas a l’entorn de la mòrt que sián impausats per la glèisa catolica o venguts de rites mai ancians : portar lo dòl, respectar e far las darrièras volontats  del defunt. Se  respectava pas aqueles còdis, tot çò que se passava mal puèi, marrida recòlta, degasts dins l’ostal, bruches suspèctes, malautiás, èra atribuït a la «venjança» dels mòrts, aquelas armas errantas qu’acompanhavan las longas nuèches d’ivèrn!

De testimoniatges, racontes faguèron l’objècte de recèrcas, de libres. Ai particularament apreciat un libre de 1987 d’A. Bloch-Raymond e J. Frayssenge: Los èssers de la Bruma e de la nuèch (premsa de Lengadòc). Un trabalh d’enquèsta, sus las paurs, las trèvas e las mascas dels grands Causses. O cal legir.

Al còp que ven !

Bona setmana e portatz vos plan!

Podètz escotar  «Lo Mescladís» de Bobí sus Ràdio Lengadòc e Radio Lodève.