Diga ! Enfin una refòrma que va dins la bona endrechièira ! L’autre ièr que partissiái trabalhar, de qué te vegère pas? Un carri de vièlhs dau Clapàs -dison aquò la REME : Retirada Esportiva Montpelhièr Escorreguda- que partissián per caminar per las garrigas. E aquí dise de non ! Non de non !

Bon, per ara i a pas res, mas dins quatre jorns nos van pilhar las ensaladetas : èrbas a la bròca, responchons e lachichons, e las tèrragrépias de las nautas tèrras… sens te parlar dels pòrres de vinha o dels espargons que van lèu nasejar. Rau. E, per pauc que ploguèsse fin de febrièr son las morilhas que i van passar. Sens te parlar de las girilhas o dels pès de motons de la davalada.

E, …rau !!

Aurosament qu’avèm un govèrn que pren la mesura de la situacion : ne cau finir amb aqueles vièlhs que petan la santat quand pica l’ora de la retirada. Un còp èra, nòu de dètz èran plegats a aquel moment, s’acontentavan d’una partida de bolas o d’un sèti au senat per charrar sus ràdio platana e, de tot biais, avián pas pus de dents. Aquò anava.

Sabe, m’anatz dire, « prenon la plaça d’un caumaire ». Òc-ben, mas lo caumaire es pas tant malfasent dins los bòsques. Va pas tan luònh e s’assadola de pizzas e de mangiscla shitburegerizada alara qu’aqueles joves vièlhs tot lor fa ventre ! An conoguda la guèrra -au mens dins los racontes dels ancians- e son espaurugats pas qu’a l’idèa de mancar. E te confituran, te borbolhadan, te fan secar figas e campairòls, te rasclan tot.

Bon, m’an dich qu’un còp passada la refòrma de las retiradas, van discutir amontdaut de l’eutanasia. Aquò va ben, mas cau pas ranconar !

Vòls que te diga ? Ane, bisques pas, galege ! Venguèsses a la manif venenta, te portarai doas o tres rabassas plegadas dins lo mocador e tombarem un borre*.

Enfin, es çò que ne dise, ieu !

La guinhada de l’IEO34. E, rau !

• * Tombar un borre : Un borre, un brot fa un gavèl. Un gavèl fa dos o tres rasims. Dos o tres rasims quichats fan un veire de vin.

Tombar un borre = beure un veire de vin

N’avètz aquí l’audio en cas que los de ràdio Lengadòc siagan a la ramassa per lo metre en pòdcats!