Passejadas toponimicas

Es sus aquel títol qu’es sortit en 2022 lo darrièr libre de Pau Fabre a las edicions « Letras d’òc. »

Pau Fabre nascut en 1935 (Nizas) es defuntat lo 12 de genièr de 2023 (Ales).

Qual èra ? Ancian professor de l’Universitat Pau Valèri de Montpelhièr es un especialista de toponimia :« Noms de lieux du Languedoc »Bonneton 1995 – en francés) libre que consulti sovent,  « Dictionnaire des noms de lieux des Cévennes – en francés» mas tanben de nombroses obratges sus la literatura e la lenga occitana : Antologia dels Trobadors,  La cançon de la Crosada, Guilhem, lo prince trobador , Itinerari occitan (ed .Gilbert Jacob 2022) … Escriguèt tanben qualques romans e una quinzena d’obratges sus la bicicleta, lo cyclo-torisme mai particularament.

Encontrèri Pau a l’Associacion de l’« Amicale Larzac Aventure » (Lo Cailar) creada fa trenta ans e ont soi aderent dempuèi nòu ans.

Fasiá pas mai de bicicleta, el qu’a fach «  mai de quilomètres qu’Eddy Merckx ! » (dixit Paul Fabre àlias Eddius) mas èra present a las A.G, a las amassadas de primas e d’auton e nos retrobàvem a l’entorn d’un repais.

Se l’ai pauc conegut, ai sulcòp apreciat l’òme que malgrat son erudicion, son apetís de saber, se sabiá metre a la portada de totes e sustot transmetre amb umor e anecdòtas cruissentas son saber amb un risolet que rescaufava los còrs…

Es aquel sens de l’umor que se retròba dins las 60 cronicas de sas « passejadas toponimicas».

Es un libre de vulgarizacion sus la toponimia, mas tot en occitan : «  es lo primièr se m’engani pas, tot en occitan e compti sus vòstra indulgéncia. Lo que contunharà, farà melhor segurament. Ai simplament ensajat de far avançar lo smilblick ! ».

Aquelas paraulas de Pau Fabre resumisson plan lo personatge : erudicion, simplicitat, umor e amistat !

Un libre indispensable !