La Setmana Occitana que lo cercle Lo Cranc de Massilhan organiza dempuèi 13 ans, aviá pres ongan un ample dels bèls. Caliá ben festejar los 40 ans  del Cranc, un dels cercles mai ancians d’Erau. 

Del 1e al 6 d’octòbre un desenat d’eveniments festius e culturals foguèron ofèrts a un public renovelat de long dels jorns de  mercé lo programa prepausat..E n’i aguèt per totes los gostes e per totes los atges. Aprèp l’inauguracion oficiala onorada de la preséncia del conse Ives Michel e de dos de sos adjunts, e mai de la conselhièra departamentala Na Fabre de Roussac, seguiguèron  de jorn en jorn,  tantossadas e seradas ricas d’animacions divèrsas.

Los enfants foguèron pivelats del jòc d’Ives Durand e Gèli Buonomo dins Lo Boçut, un conte risolièr virant al fantastic. Lo cant prenguèt una plaça de tria amb las coralas Nadalenca  e Agde Musica, e los cantaires  Laurenç Cavalhié e Felipe Vialard dins de seradas magicas de vam e de poesia. Josiana Ubaud desvelèt la significacion e mai d’un còp la grafia vertadièra de fòrça toponimes occitans. Las confrariás de penitents que sa memòria es tant presenta encara per vilas e vilatges,  foguèron evocadas per Albèrt Arnaud. La mòstra bèla del CIRDOC sus Joan Bodon foguèt l’escasença d’escambis dins una taula- redonda consacrada  a aquel escrivan màger del sègle XX occitan. La Calandreta Dagtenca organizava coma de costuma lo balèti amb los irremplaçables Castanha e Vinovèl. De mai que, per metre lo mond en cambas, èra estat precedit d’una sesilha d’aprendissatge de dansas tradicionalas.La Setmana s’es acabada dins la glèisa  St Joan Baptista per un bèl  concèrt de la corala Agde Musica amb la messa occitana del Paire Gouzes, jos la direccion d’Eric Laur, amb lo solista Miquèu Vayssière e Sofia Parmentier a l’orguena.

             Polida Setmana  provesida de plasers e de descobèrtas,  ponctuada de rencontres a l’entorn de las taulas  per se restaurar. Lo Cranc a recebudas las ajudas de la Vila, del Departament, de la Region e de l’IEO d’Erau.