Conte: Al país del mond aürós…mas !?(2)

Quin èra aquel esplech novèl ?

Dempuèi qualques decennis la sciéncia, las invencions avián fach de passes de gigants : medecina, recèrca scientifica e segur informatica !

Es lo telefòn qu’anava venir l’instrument del cambiament al país de « Sòmastruc ».

A la debuta, èra un telefòn tot simple. Puèi s’es « enriquit » : SMS, fòto, internet, aplicacions…Es ara un « telefòn intelligent » !

I a plan agut qualques resisténcias, mas pauc a cha pauc las «« Sòmastrucas »» e los « Sòmastrucs » l’an adoptat. Se desplaçavan dins las carrièras, al trabalh, a l’ostal amb lo « telefòn intelligent » pegat a la man e agachavan pas mai cap al cèl, lo cap  èra totjorn baissat, fixat sus lor esplech novèl !

Alara inexorablament venguèron de « Caps baissats ». Pas mai de contemplacion d’estelas,  de sòmis, de contactes amb los autres o alara tan pauc !

E tot s’accelerèt ! Un jorn lo President del país de « Sòmastruc » prenguèt la paraula  : «  Brave mond, una vida novèla s’obrís . Amb l’intelligéncia artificiala, viurem melhor ! Acabat los caps levats a la recèrca de sòmis jamai realizats, acabat las pèrdas de temps , sèm dins un mond brancat ! Dins qualques jorns, vos prepausarai un nom novèl per  lo nòstre país ! Acabat los caps en l’aire, visca los caps baissats ! »

Aquel messatge difusat pertot suscitèt pas tròp de revòlta. Lo progrès èra en marcha, un mond novèl arribava !

Estranh, aquel mond novèl, luènh d’aquel evocat per Joan Jaurés dins los « contes dels Balssàs » de Joan Bodon ! Mas l’espèr de Jaurés èra ja temperat pel bruèis que «  o vesiá pas clar lo temps novèl ! » levat se l’amor èra aquí per passar las espròvas.

Alara l’amor salvarà los  « caps baissats » ? Qual sap !

E cric e crac, lo conte es acabat, e cric e crac los caps son plan baissats !

Zon , e portatz vos plan !