AICÍ SÈM Eric Barta
LOS CASTÈLS DEL COCUT II
Car legeire, se capita qu’en mai passat anèri a sant Gèli del Pichòt Ròse, ont vegèri la tomba de Pèire de Castelnau dins la cripta de l’abadiá. Es lo legat pontifical que foguèt assassinat en 1208. Sa mòrt violenta permetèt a Innocent III vengut papa en 1198 de combatre per totes los mejans l’eretgia catara qu’èra a proliferar dins la vescomtat Trencavèl e lo comtat de Tolosa : levèt e mandèt ni mai ni mens qu’una crosada, autrament una guèrra per motius religioses. La crosada es un afar pensat e presicat per Urban II -de son nom Eudes de Lagery- a Clarmont d’Auvèrnha, ont se tenguèt un concili en 1095 e ont lancèt l’apèl a la crosada lo 27 de novembre. Aital s’inaugurava per dos sègles las crosadas qu’anavan dominar l’istòria de la crestiantat. Ailà se pòt veire son estatua que mòstra l’èst als cavalièrs del Crist, sus la plaça de la catedrala de Clarmont o pus pròche la pintrura de la sala dels illustres al Capitòli, pintrat per JP Laurens. Tot aquò per dire malaürosament lo ròtle jogat per la papautat dins l’exacerbacion del braç armat. L’arribada de l’armada dirigida per Simon de Montfòrt a Besièrs, e Carcassona donèt lo desastre que coneissèm : masèl general pels primièrs, e expulsion dels abitants pels segonds, un còp son compte reglat a Raimon Rogièr qu’aviá 20 ans. Albi coma vila d’origina de la dinastia dels Aton Trencavèl auriá pogut patir un sèti ambe represalhas, mas decidiguèt de se sometre còp sec, per evitar un novèl massacre, mentretant La Vaur serà pas esparnhada dos ans mai tard, la senhora Guirauda de Laurac serà escampada dins un potz, e son fraire Aimeric de Montreal, sol senhor occitan vengut en ajuda contra l’armada de Montfòrt acabarà penjat ambe 80 cavalièrs.
Tornem als dits castèls, ara « forteresse royale du Languedoc » es estada impausada pel comitat portaire a l’Unesco, per ajustar a l’umiliacion, coma s’aquò bastava pas. Los membres de País Nòstre, foguèron estabosit en arribant a Querbús en julh passat de veire lo panèl ja implantat « una politica del fach complit » per citar lo J.P. Laval, abans quitament l’anoncia en Corèa ! Diguèri a mon interlocutor qu’a l’abadiá de Cassan (Rojan èra çò meteis), mas aquí es l’« abbaye » qu’es qualificada de « royale ». Cal saber qu’a l’abadiá de Cassan, los Trencavèls, -los meteisses sortits d’Ambialet que tenián tanben Burlats ambe lor cort d’amor trobadorenca- s’i fasián enterrar, èra lor panteon quand avián pas trempat dins lo catarisme… Donc « sabre e aspersor » se son plan endevenguts per far engolir als recents conquistats, tot un fum de messorgas, l’idèa estent de remplaçar l’aristocracia locala, per un fum de francimands « bons catolics » leials al rei de França, passat mèstre del comtat de Tolosa a partir de 1229 e sustot en 1271 ambe la defuntada de Joana de Tolosa. Los Levy que s’installèron pròche Mirapeix (Arièja) èran venguts ambe Montfòrt, lo castèl de Bonafons, foguèt d’alhors batejat curiosament de Lévis al sègle XIX, e tira son nom actual d’aquela familha, mentre que la fortificacion foguèt quilhada per Sicard Alaman de Pena, fisèl vassal del comte de Tolosa ! Meteis processús de remplaçament sistematic dins la memòria collectiva d’aicí d’alà…
Coma ai escampilhat l’article precedent del 31 de julhet a d’amics gascons vaquí la reaccion d’Enric al meu article : « J'ai moi-même ressenti un haut le cœur, en écoutant une émission télévisée il y a quelques jours, ces forteresses étaient dites royales.
Il y a quelques jours, le préfet de Bayonne et les élus locaux ont polémiqué sur l'usage du basque et du gascon, ce n'est pas terminé. J'ai relayé l'info à mes contacts avec quelques mots d'amertume : La colonisation par la royauté, la disparition par la république. La volonté de l'état français, depuis longtemps, est de faire une unité par force. Ce qui gêne, c'est pourquoi il faut l'effacer à tout prix, est bien le génocide contre les populations occitanes, perpétré depuis 1209 ». (citacion del corric)
Demòra pas grand causa de mai a dire tant los eveniments recents corrobòran las atacas del pauc de çò qu’a escapat a la francisacion de massa. La fin de las ajudas a l’ofici de la lenga catalana a Perpinhan son simptomatics de decisions politicas contra la preséncia de las lengas de França-, tant que França serà afectada per l’ipercentralisme. Lo tractat de Corbell que fixava la frontièra entre las doás coronas sus la Corbièra foguèt pas respectat. Los catalanò-aragoneses espandiguèron lor reialme cap al sud mas França se crusquèt encara Gavaldan, Montpelhièr e s’ataquèt mantun còps al Rosselhon ocupat per Loís XI, tre 1463 fins a 1493. Podèm evidentament qu’admetre que los ara celèbres castèls serviguèron d’apevason a la reialtat per completar lo barrolh carcassonés, aquels castèls estent nomenats los « filhs de Carcassona ». Una Istòria plan Nòstra que demorarà pasmens totjorn marcada pel sovenir catar : cal exigir que tota placa toristica venga escricha ambe d’occitan per adocir l’escarni qu’es fach a la memòria de nòstres reires e davancièrs ! Anem per acabar, vos convidi a escotar la cançon risolièra los Castèls catars del grop carcassonés Test : eles almens sabon de qué parlan !