Senténcias definitivas

La filosofia permet de debanar los fials de la vida, mas tanben de los entremesclar per ne faire lo brocat matisat de nòstres jorns e de nòstras nuèits. Vaquí un punhat de senténcias que son tant definitivas coma verificablas, mas que, segon vòstre liure arbitre (???!!) podètz trapar un pauc (o bravament) fantasierosas, falsièras, vertadièras o messorguièras:

• Amistat: L’amistat se viu pas a mitat.

• Amor: Amb tot l’amor que vòls, aniràs pas mai luènh qu’al caireforc.

• Aventura: Partir a l’aventura permet de trapar lo bon camin.

• Barrica: Dins la barrica de Diogèni s’amaga lo saber del monde.

• Beure: Qual-a beu vin es totjorn en vida. 

• Blanc: La nèu blanca es causa de jorns negres.

• Camin: Creses seguir ton camin qu’es el que te mena. 

• Canard: Cossí un tiron poiriá cantar just?

• Contradiccion: Èsser palhassa e triste es una brava contradiccion.

• Crostet: Sens crostet, la mica existiriá pas.

• Desmesura: Desmesura non coneis frontièras.

• Distància: La distància ten la longor que li impausas.

• Enemic: Plan sovent siás ton melhor/pièger enemic.

• Esperança: L’esperança a pas de besonh de concretizacion.

. Esperança: Tròp sovent esperança flaira a ranci.

• Estelas: La nuèit, las estelas lusisson; lo jorn, s’atudan.

• Filosofia: Es pas en filant a Sofià que vendràs filosòf-a.

• Fin: La debuta de la fin coneis pas de fin.

• Finala: Una finala es pas una fin finala, mas l’anóncia d’un tornar-començar.

• Illusion: Al canton d’un agach, sovent nàisson illusions.

• Legir: Val mai legir que fregir.

• Literatura: Cal saupre causir entre escritura e confitura.

• Luna: Fintar Luna te permet de comprene los autres.

• Mar: Las èrsas de la mar coneisson pas de pausa.

• Malautiá: Es pas jamai aisit de combatre lo mal.

• Militant: Se trapa mila e tantas causas de faire.

• Musica: Pòdes conèisser la musica, acabaràs per pagar la nòta.

. Musica: Aquò rai, escotarem de rai.

• Pan: Los pastissons deurián èsser nòstre pan quotidian.

• Paratge: Fa temps que clavèron Paratge dins un garatge.

• Partir: Partir es pas una garantida de retorn.

• Passion: La passion es una frucha saborosa.

• Paur: D’èsser pauruc t’esvitarà pas los trucs.

• π: Los saberuts arriban pas a saupre la fin finala de π, alara que cadun e caduna sap faire pipi.

• Patz: Jamai guèrra menèt a la patz vertadièra e prigonda.

• Pietat: Ages cap de pietat; se que non, passariás per un pietadós.

• Pigresa: La pigresa es la santat.

• Plòure: La pluèja es bèl temps pels cagaròts.

• Predestinacion: Lo paure Uc èra pauruc: èra sa predestinacion.

• Pregar: La pregària es l’enemiga del faire.

• Prejutjats: Siague pas l’esclau de tos prejutjats.

• Principi: Arquimèdes èra un òme de principis.

• Rescalfament: Lo rescalfament te provòca frejolums dins l’esquina.

• Saber: Qual-a ne sap tròp sap res.

• Solelh: La nuèit rosega lo poder del solelh-mèstre del monde.

• Sòmi: Ton sòmi ven malsòmi quand se concretiza pas.

• Teologia: Val mai daissar Dieu dins son ostal/ los dieusses dins lors ostals.

• Valor: Çò que val per l’un, val res per l’autre.

• Voide: La societat modèrna prepausa un tròp-plen de voide.

Aristotèl Roch