Los noms de luòcs son portaires d’istòria e de culturas

La temptacion de tornar escriure l’istòria fa plan enveja als poders per assegurar lor dominacion non solament sul present mas tanben sul passat. N’anam veire quauques exemples sus la planeta, mas tanben sus nòstra tèrra occitana dins aquestes temps ont la dintrada de l’Ostal Blanc es refusada a un jornalista d’Associated Press per çò que son agéncia contunha d’utilizar la denominacion Gòlf de Mexic en plaça de la denominacion Gòlf d’America, volguda pel president Trompeta.

Una estatua de conquistador al Peró

A Limà, grops indigènis an protestat contra la reinstallacion pel conse ultra-conservador de l’estatua del conquistaire Pizarro sus la Plaza de las Armas a costat del palais presidencial d’ont èra estada tirada en 2003 per èsser mandada dins un luòc gaire frequentat. Los manifestants constatavan : « Es una ofensa, una ofensa per totes los pòbles indigènis de Peró, d’America e del monde. ». Vertat que lo Pizzaro conquistèt l’empèri incà al sègle 16 al prètz d’un grand genocidi.

Denali, montanha d’Alascà

Pels pòbles d’Alascà, lo mont se ditz Denali, çò que vòl simplament dire: la montanha (es lo mont lo mai naut d’America del nòrd). Per Trump, li cal tornar balhar lo nom d’un president dels Estats-Units que botèt jamai los pès dins lo territòri mas qu’èra un precursor de las politicas menadas pel poder novèl american e qu’anexèt Hawai.. Atal, lo mont Mc Kinley reapareis e pren lo nom que li balhèt un cercaire d’aur…

E sabiatz qu’Everest es lo nom d’un alpinista e non pas lo nom local de la montanha sonada Chomolungma en tibetan (divessa-maire del monde) o Sagarmatha en nepalés (divessa del cèl) o Devgiri en sanscrit (la montanha sacrada) o Shèngmu Feng en chinés (divessa de l’univèrs)? Aquò cambia prigondament la vision de son environa, son rapòrt amb son luòc de vida, … 

La tèrra arcolana

L’explorator viking Erik lo Roge trapèt una tèrra que nomenèt dins sa lenga, lo vièlh norrés (a l’origina de las lengas escandinavas) : groenland, la Tèrra verda, greenland en anglés. Per butar lo president Trompeta de s’emparar d’aquels territòris, un parlamentari american depausa una proposicion de lei per balhar al país lo nom novèl de : país roge, blanc e blau!!!

Jornada d’invasion en Australia

En Australia, la fèsta nacionala se ten lo 26 de genièr per ramentar l’arribada dels 11 batèus angleses en rada de Sydney en 1788 que menavan los primièrs estatjants europèus del continent. Los pòbles indigènis an batejat aquel jorn  lo jorn de l’Invasion o lo jorn de la Subrevida e manifèstan cada an per la reconeissença de lors dreites.

Oigors

Avèm ja evocat dins aquesta cronica lo sòrt dels Oigors en China ont se cambièt centenats de noms de luòc qu’avián una significacion fòrta per la populacion locala (religion, istòria, cultuira,…) per noms mai compatibles amb l’ideologia e la linha del Partit comuinista chinés. Atal, se multiplican los Bonur, Unitat e Armonia…

Quand los catars rotlavan sus motòs…

Lo Conselh Departamental d’Aude ven de decidir de nomenar lo dossièr presentat a l’Unescò per classament al patrimòni mondial dels castèls, un temps nomenats falsament de catars, de Carcassona, Aguilar, Las Tors, Montsegur, Pèirapertusa, Puèglaurenç, Queribús e Tèrmes : Forteresses royales du Languedoc. La realitat istorica seriá estat de dire puslèu : Castèls de l’Opression Reiala (francesa).

Mas aprenèm atal que los Catars manquèron una escasença bèla de salvar la civilizacion occitana… Lo Cathare Mob’s tour se debanarà del 1èr al 4 de mai dins la contrada de Quilhan. Pels moments de pausa, los participants auràn dreit de se requinquilhar amb unas grasilhadas e unas fritas (medievalas?)…

A, se lo comte Ramon aviá agut una Harley-Davidson, se lo senhor de Cabaret aviá pogut traçar dins la nuèit sus sa Quau-es-aquí… Quna capacitat de desplaçament e d’intervencion auriá agut un escadron de faidits en petarons?

Caravèlas e steelpans

Urosament, arriba que l’actualitat nos porgisse contra-exemples. Atal, lo govèrn de Trinidad-e-Tobagò ven de decidir de manlevar las caravèlas del Cristòl Colomb del blason del país e de las remplaçar per l’instrument local de musica  los steelpans, que son plan utilizats los jorns de Carnavalhttps://www.facebook.com/watch/?v=195989102551642 .

Simbolic Roch