Lo jornalisme de proximitat jòga un ròtle clau pertocant la preservacion de la diversitat informativa e culturala, mai que mai dins de territòris amb de lengas minorizadas coma l’occitan. Per aquela rason, Jornalet es plan content d’èsser mèdia collaborador del 1r Rescontre de mèdias de proximitat d’Occitània e en catalan, que se tendrà los 7 e 8 de març venents a l’auditòri del musèu Narbo Via de Narbona.

Aquel eveniment recampa d’editors, de jornalistas e de professionals del sector per debatre d’estrategias d’innovacion, de collaboracion e de desvolopament del jornalisme de proximitat dins nòstres territòris. Se tractarà de tèmas essencials coma la captacion de nòvas audiéncias joves, l’integracion de tecnologias emergentas dins la comunicacion locala e la creacion d’un espaci comunicatiu euroregional transfrontalièr.

Aquel eveniment l’organiza l’Associacion de Mèdias d’Informacion e Proximitat (AMIC) que recampa mai de 600 mèdias en catalan e que presenta ara sa seccion occitana. De remarcar que l’organizacion a agut la sensibilitat de comprene l’occitan coma lenga plenament reconeguda dins las sesilhas. Aital, delà lo catalan e lo francés, i aurà de servicis de traduccion simultanèa en occitan, çò que garentirà que la lenga del país siá presenta e accessibla per totes los participants en plena dignitat. En mai d’aquò, divèrses jornalistas e creators occitans intervendràn activament dins las conferéncias e los debats, refortissent l’idèa que la premsa de proximitat es una aisina fondamentala per la vitalitat de nòstras lengas e culturas. Entre tantes autres intervenents, a l’eveniment participaràn activament Amic Bedel (Piget Prod.), Gabrièu Pelisson (Parpalhon Blau) e la còla de País Invisible.

Jornalet, coma mèdia numeric en lenga occitana, assumís l’engatjament de contribuir a aquel espaci de debat e d’innovacion, en establissent de ligams amb d’autres mèdias e professionals que partejan la meteissa volontat: la de far un jornalisme pròche, connectat amb la realitat del territòri e capable de crear de comunautats engatjadas.

Encoratjam nòstres legeires a seguir aquel rescontre e chifrar sul ròtle de la premsa de proximitat per aparar e far lusir nòstra lenga. De manténer viu l’occitan dins l’espaci mediatic es un prètzfach collectiu, e d’espacis coma aqueste nos ajudan a avançar amassa sus aquela draia.

Per mai d’entresenhas https://www.mpoc.media/