Sabèm pas exactament que la memòria dels òmes s’es perduda e que la ratuna rosiguèt los archius- mas fasiá mai d’un quart de sègle que l’Albèrt teniá la barra de nòstra seccion departamentala. E la premsa ragèt dau bon vin. De vin d’aquí, en quantitat e en qualitat !

Pròva es. Aicí sèm: dreches! 178 sòcis, 27 associacions, 394 « estudiants », 34 corses, mai de 130 eveniments prepausats per lo malhum en 2025, una librariá occitana qu’au  mond tot li fa lengueta etc.

Mas l’Albèrt voliá passar la man…

Es causa facha dempuòi dissabte passat que lo CA acampat en seguida l’AG de Mèsa elegiguèt Josiana Daunís Martí coma Presidenta.

Podèm pas que mercejar e tirar lo capèl au Sénher President (que, vos rassegure, ven vicepresident) e saludar Josiana d’un Visca la Presidenta!

Longamai. E… RAU!!

Cars amics de l’IEO34,

Dempuèi la pèrda de mon òme, Robèrt Marty (fa cinq ans ), me soi installada dins Erau. Fau partida del cercle local Lo Cranc de Massilhan. Mas benlèu sabètz que, mon estacament a la lenga e a la lucha per l’occitan, data pas d’ièr (50 ans de bolegadís).

A la demanda d’Albèrt Arnaud que se voliá retirar de la presidéncia, ai acceptat de préner sa plaça e lo conselh d’administracion a plan volgut acceptar e me fisar aquela taca que me fa onor. Mercegi l’Albèrt per son trabalh e totas aquelas annadas passadas al servici de la nòstra lenga.

Farai mon possible per anar véser totes los cercles locals tre la dintrada e préner lenga amb totes e totas. Vos soeti un bon estiu e bonas vacanças.

Josiana Marty Daunis