Diga ! D’unes ben pensaires, lo mond n’es comol, nos dison ara que devèm pas pus emplegar lo mot negre. Aquí sèm plan embarrassats, nautres occitans, un còp de mai daissats de caire per lo progès.

Mas, es antau, per dançar amb la musica vos caudrà dire d’ara enlà « black », black divendres que per lo moment friday es pas obligatòri. Es tant d’estauviat.

Avètz lo drech tanben de dire de « color » alara que vos enclosquèron a l’escoleta, d’annada a de reng, que lo negre n’èra pas una de color… Acabat lo pecat « negre », ara ne podètz faire de totas las colors e se ma cançon vos sembla un pauc alangorida, qu’i pòde ieu, amb una particion tota en nòtas blancas.

Vejatz un pauc las incomprenesons que mancaràn pas de nos tombar dessús coma fa quauques annadas, quand n’i a un que portèt lo planh contra la comuna de Sant Andrieu de Sangonís que bategèt una giradoira de l’escais collectiu dau vilatge dels « Pòrcs negres » o dels companhs que la volián tombar aquela blaca que lor manjavan los olivièrs. N’i a una que demandèt perqué e çò qué n’avián contra los blacks ? En tot cas, se pòdon afanar de las amassar las olivas, abans que vairèsson, mas pòdon dire adieu a l’òli fin.

Volètz que vos diga ? Me daissère dire, per de mond que lo costegèron, qu’au paure Soulages, que pecaire ne portam lo dòl, son pantais lo mai car, seriá estat d’èsser nascut dins las Africas e non pas a Rodés. Li auriá agradat d’èsser coma lo carbon de la Sala mas pauròt èra blanquet coma lach de vaca d’Aubrac. Pasmens, coma tot bon avaironés -e  es pas un etnotip !- èra tras que valent lo Soulages. Auriá pas mancat qu’aquò, que se prenguèsse un negre per negrejar sos tablèus !

Rai, de tot aquò e dau demai ne metrem pas lo crespe a l’ase !

Enfin, es çò  que ne dise ieu.

La guinhada de l’IEO34. E, rau !

 Dins l’espèra que ràdio Lengadòc trapèsse una solucion a son problèma de personal per metre a jorn los podcasts vos prepausam l’audio de la setmana. Bona escota.