Diga ! Sabe pas se n’i a fòrça que legisson l’occitan o qu’escotan ràdio Lengadòc, mas aquò me deu pas empachar de desirar als amics chineses -que grafinhère d’unes còps dempuòi la tròba geniala de la covid- una bonna annada dau lapin d’aiga.

Me regaudisse de los saupre en fèsta, liures enfin d’anar visitar los sieus e, pecaidonets, de plorar sos mòrts. Los savis chineses auguran d’una annada de patz, suava e bona per la diplomacia. Baste que non s’enganan ! Quant a ieu que siái, segon l’astrologia setòria, la sola que respècte, Palhassa ascendent Tòca-la Bomba, lo civièr de lapin de la mameta, m’aime mai puslèu de l’acompanhar amb de vin d’aquí, -lo cinquen element!-  que non pas d’aiga d’aval. Rai, es una pichona diferéncia culturala de lapin-lapan pas res.

Per los Vietnamencs èra dimenge la fèsta dau Tèt que los faguèt dintrar dins l’annada dau cat. Aquí tanben patz e bona fortuna son marcadas dins los astres e saique per un còp lo cat passarà pas per la brasa ?

Vòls que te diga ? Quant a nautres, bon pòble de França, ges de besonh d’escotar los devinaments de Madama Solelh, d’agachar la luna, l’estelum e las ensenhas … Emai siaguèsses nascut de la darrièira lapinada, quand veses sus de platèus de TV qu’apartenon per la màger part a de miliardaris, un govèrn de mascolhonats-quand-t’ai vist, que per sa mitat es compausat de ministres milionaris, te venir dire que cau faire d’esfòrces per ta retirada, qu’es de plànher mas que i a pas d’autras solucions, qu’es de racacòr que te cambian las règlas dau jòc quand arribas a la tòca, as lèu fach d’entendre coma sèm mai, paure de nautres, dins l’annada dels cocuts.

Enfin, es çò que ne dise, ieu !

La guinhada de l’IEO34. E, rau !!

N’avètz aquí l’audio en cas que los de ràdio Lengadòc siagan a la ramassa!