Los dires de Diogèni

Lo filosòf Diogèni es conegut per aver viscut dins un barral. Mas, per la vertat vertadièra istorica, cal tornar als premicis de l’afar. S’a pogut viure dins un barral, es que nòstre pensaire aviá aperabans begut lo contengut de la futalha: aquò representava sabi pas quant de pintas d’ozò…

En modèste discipol del mèstre, soi dintrat en soscadissa pensativa just aprèp aver begut una mèscla d’una cantina de muscat de Sant-Joan de Menerbés  e d’una cantina de cartagèna del Castèl Vilamanha. A vos de jutjar a la resulta se lo metòd es eficaç!!! 

Pensadas muscato-cartagenicas

• Amor: Que siá plaser o dolor, l’amor demòra amor.

• Anís: Lo pan d’anís es doçor de paradís.

• Barbarós: Un barbarós cantarà totjorn melhor qu’un barbut sens barba.

• Bruch: Lo bruch del silenci arriba que siá insuportable.

• Caçòla: Una caçòla es pas una caçairòla. (*)

• Cant: Lo Marcèl Panhòl cantava coma un rossinhòl.

• Caulet: De còps, l’amor s’amaga al fons d’una sieta de sopa de caulets.

• Caulet: Val mai un caulet qu’un freg-polit.

• Chinés: Tant de còps faguèt chin-chin, mas jamai parlèt chinés.

• Discriminacion: Se parla totjorn de Luna, mas jamai de l’autra.

• Empacha: Qual-a o qué vos pòt empachar de somiar esvelhat-da?

• Felibre: De qué pòt beure un felibre encigalat?

• Fin finala:  Una jornada sens vin es una jornada sens fin.

• Fissar: Lo darbon sap pas fissar.

• Fòrça: Plan fòrt lo cagaròl que pòt nadar en cròl (crawl).

• Joinessa: La Luna èra plan jove quand traversèt lo primièr quartièr,

• Lusèrp: Lo lusèrp se’n crei d’èsser una sèrp amb de patas.

• Maridatge: La polida Joana quand se maridèt venguèt Dama Joana.

• Morre: Las amorras fan lo morre quand veson un pòt de mostarda Amorà.

• Musica: Canh que jaupa farà jamai una cançon.

• Nadal: Lo sap nadalenc sap res de l’intemporalitat.

• Noiridura: Los pterodactils s’afartavan de dàtils.

• Objectiu; Cada ser, dins una granda boita, l’asuèlh pensa de clavar per totjorn lo grand solelh. 

• Pagalha: Quand canta la sinseringalha, tot se degalha.

• Pan: Pòt arribar de trapar un crostet pel sòl.

• Paraula: Probable qu’al cap del silenci, traparem la paraula muda/nusa.

• Pensada: Las pensadas te pòdon menar fins al cap de l’imaginari.

• Poma: Poma roja e poma verda son en cèrca d’una poma d’irange.

• Pompa a l’òli: Los Shadòks presavan la pompa a l’òli.

• Preferéncia: M’agrada mai gigòt que gòji.

• Prejudici: L’equinòxi pòrta prejudici al solstici.

• Ruscada: Las mitonas son fadas leugièras.

• Sentiment: Sovent lo sentiment es portaire de messorga(s).

• Silenci: Los mamots dison pas mai un mot.

• Silenci: Lo silenci es coma un grand crit. 

• Solelh: L’amor es un solelh que te crama los uèlhs. 

• Sòmi: L’inconscient del sòmi vos conta çò qu’auriá pogut èsser. 

• Tafuratge: Pòt vertadièrament tafurar la preséncia de l’auséncia.

• Talent: La talent justifica los mejans.

• Tamborn: L’amor es un tamborn que fa pataquejar lo còr.

• Terminologia: Perqué dire salpicar de sucre e non pas sucrepicar?

• Tòca: La tòca del papagai repetitiu es de botar la pagalha.

• Triangle: Perqué l’ipotenusa se devestiguèt?

• Umanitat: Una vise es simbòl de l’abís de l’umanitat.

• Veire: Lo veire a mitat-voide es, de fait, a mitat-plen.

• Vertat: Probable/segur que vertat e messorga son bessonas.

• Wapiti: Sens vos comandar, a cup of tea pel wapiti! 

Diogèni Roch

(*) Dins d’autres documents aparentament apocrifes e de fonts gaire seguras e plan dobtosas, se trapa la formula: Una caçairòla es pas una caçòla.