La setmana passada, nòstre editorial soslinhava l’importància de combatre l’extrèma drecha dins las eleccions legislativas imminentas dins l’estat francés, e raportàvem qu’un movement occitan, mai que mai fòrt en Lemosin, aviá facha una crida a se mobilizar e jónher lo Nòu Front Popular.

Aquesta setmana, nos sèm assabentats de las candidaturas occitanistas per aquestas eleccions. D’un caire Endavant/Partit Occitan se presenta en nòu circonscripcions amb lo sosten de Regions e Pòbles Solidaris en Bearn, dins las Landas, en Albigés e Provença. D’autre latz, Bastir Occitània a anonciadas sèt candidaturas en Comenge, Tolosan, Armanhac, Albigés e Agenés amb lo sosten de la federacion regionalista Las Regions Unidas d’Euròpa, que compren curiosament un partit provençal antioccitanista que se presenta dins lo departament de Var.

Nos sèm tanplan assabentats que qualque candidatura occitanista a contactat lo Nòu Front Popular, mas qu’aqueste non sonque a refusat de collaborar mas tanben a quichat per lo retirament de listas. Aquel episòdi lamentable nos remembra que çò mai semblable a un jacobin de drecha es un jacobin d’esquèrra, totes dos units dins lor refús instintiu e impulsiu de la diversitat lingüistica de l’estat francés.

De tot biais, a mai Dòna Le Pen e Sénher Mélenchon sián de nacionalistas franceses allergics a l’occitan, cresèm que lo Nòu Front Popular presenta un programa mai sensible a las minoritats socialas e nacionalas, mentre que l’extrèma drecha es reaccionària e ultrafrancista per natura e que lo macronisme a faches de reformas qu’an greujat l’ensenhament ja precari de l’occitan, a pas aplicada la Lei Molac e a menadas de politicas unicament favorablas a la borgesiá franchimanda al poder. Per tant, fasèm una crida als legeires per que presenten de reclamacions per tal de melhorar lo programa del Nòu Front Popular abans dimenge venent. Un brave amic de Jornalet s’es quitament engatjat a far arribar los messatges personalament a François Hollande, que torna a la politica activa en Lemosin.