Passejadas a l'entorn de las fonts ...
Passejadas a l’entorn de las fonts …
Amb lo calimàs, sèm a la recèrca de la frescor : rius o lac ( Salagon)
Nòstra region al climat mediterranèu coneis d’estius torrids accentuats ara pel rescalfament climatic !
Alara per nòstras passejadas, la prudéncia es de rigor : evitatz los moments cauds de la jornada e ensajatz de « cercar l’ombra ».
Nòstres vilatges e las carrièras pichonas, las placetas, permeton de far de passejadas solombrosas e de descobrir un patrimòni bastit de còps mesconegut.
Es lo cas per las fonts, de còps assecadas aquel estiu, mas que son remarcables.
Dins nòstre còr d’Erau ne trapam dins quasi totes los vilatges.
La font, sovent al centre del vilatge, èra un luòc ont anava emplenar los orjòls, mas èra tanben l’endrech ont se charrava, s’escambiava, de còps criticava tal o tal ! E de boca a aurelha las novèlas s’espandissián a una velocitat a far pallir las rets socialas actualas e autras telefòns intelligents !
Volètz veire de fonts de pèira de talha escultada ? Cap a Montarnaud plaça de la font, o plaça Negro a La Boissièira o encara la font dicha « Molière » plaça de la Victòria a Ginhac.
Lo Poget, vilatge remarcable per las « fonts ». Sus la plaça centrala la font del «grífol ». alimentava lo vilatge en aiga potabla. Mas se tròba tanben de fonts alimentadas per tota una ret de pichons aqüaductes sosterranhs : la font de Patari. Dins lo vilatge de Tressan una font « fresca » es alimentada del meteis biais.
D’autras fonts son dominadas per d’estatuas coma a Aniana, Belargan, Montpeirós, Ginhac, Puèg-Abon, Sant Andrieu de Sangònis, Sant Pargòri…e un fum d’autres !
A veire tanben de fonts monumentalas : font Roqueblave a Plaissan o plaça de la comuna a Sant Joan de Fòs!
De passejadas « refrescantas », se se pòt dire aital !
0 commentaires