Lo Novèl Almanac setòri e de las ribas de Taur 2025-2026 es paregut

Aquesta edicion 2025-26 dau Novèl armanac setòri e de las ribas de Taur es pro eclectica e pausa de questions : èsser de son temps dispensariá d’un agach critic sus l’evolucion de nòstra vila e de las vilas a l’entorn de l’estanh ? Viure amb son temps justificariá d’escafar los testimònis de l’istòria ? Lo manat d’articles propausat aicí es lo fach d’estatjants de Seta e de las ribas de Taur, d’unes de memòria, d’autres de creacion, un tal i vai d’una istòria risolièra, d’autres de lors reflexions, o encara de lor esperit reborsièr. E coma de costuma, los artistas pòrtan lor contribucion e lor agach originau sus lo monde.

Ja, dins l’Almanac 2024, contèrem l’istòria dau quiòsque Franke, emblèma d’umanisme e de cultura. Aqueste còp parlam de las baraquetas de Sant-Clar, antan luòcs de convivialitat simpla, uòi mòstra de la cròia « belle villa avec piscine et vue sur la mer » ; tanben das noms de quartièrs portaires de sens istoric remplaçats per d’apelacions artificialas e de l’origina d’unes patronimes. De tèxtes d’autors evòcan de questions de societat.

Dins sa marcha cap a l’avenidor, Seta seriá pas a se copar de son Istòria ? Las vilas a l’entorn de Taur tombarián pas jos l’apèu de las sirenas toristificairas ?

A vautres, legeires, de ne jutjar !

E rendètz-vos a l’Almanac seguent !

Miquèla Stenta – Presidenta dau ceucle setòri.