Jogar sens ordenador, sens informatica?

par Bobí lo contejaire

Dempuèi qualques annadas tot s’es accelerat. Nòstra societat s’es informatizada! Dins nòstra vida tot es connectat: trabalh, vida personala, lésers… que sabi encara.

Dins las «aventuras de gran de Milh» del projècte pedagogic occitan (veire article del 2 de març), descobrissèm o tornem descobrir de jòcs mai o mens tradicionals, jòcs d’exteriors, de cort d’escòla, per la màger part sens informatica!

Avèm totes jogat : al pè-ranquet, al lança-berret, a las quilhas, als ossets… e benlèu a «Cotelon-morron». Vaquí la règla del jòc.

Material: «Lo cotelon-morron»: es un objècte pichon (calhau, bot de fusta…)

Règla del jòc: Los mainatges son seguts en cercle e espèran las mans jonchas de recebre «lo cotelon» e cantan: « Passa, passa lo cotelon morron, passa, passa lo cotelon morron!». Lo jogaire cargat de remetre l’objècte, o ten amagat entre sas mans juntas. Passa d’un a l’autre en pareissent lisar l’objècte entre las mans de cadun. La distribucion acabada, s’adreça a un camarada (qu’a pas  l’objècte) e li demanda: «As lo cotelon-morron? E lo mainatge respond: «Non ,pauron! – Alara lèva-te e cèrca-lo!»

Lo jogaire questionat se lèva, daissa sa plaça e va questionar un autre jogaire. E atal de seguida fins que lo detentor del «cotelon-morron» siá trobat: «As lo cotelon-morron? – Òc l’ai! – Alara lèva-te! Qual a ganhat? Qual a ganhat? Es lo mainatge qu’a trobat lo cotelon-morron!

Avèm aquí un exemple de jòc collectiu, mas se poirà jogar als ossets (defòra o dedins), far de jòcs de devinalhas, dels dessenhs, cantar, mimar, bricolar… Plaça a l’imaginacion dels pichons e dels grands, daissem de costat totes los jòcs d’ecran per jogar defòra quand es possible!

Zon, e ara cal jogar !

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.