Una sala subrebèla mesa a nòstra disposicion per la comuna; una assisténcia nombrosa e atrabalhida que mòstra, s’o caliá, la vitalitat de nòstra seccion departamentala (78 vòtes e un desenat de poders) aquò malgrat las dificultats que son davant nautres; de rapòrts votats a l’unanimitat per claure l’exercici 2022; d’escambis positius e constructius amb d’idèias e dralhas de cavar; lo renfortiment dau CA mercé las candidaturas de Linà Mèstre e Josiana Daunis-Marty; lo ponch sus l’IEO federal mercé Marc Vidal e Maria Jo Dory; la reflexion en cors menada a l’IEO OPM sus la reparticion dels escotissons per Miquèla Stenta; de vendas a tot petar (qual dirà encara que lo libre occitan se vend pas?); la visita dau deputat Sebastian Rome (LFI) e de Ludovic Cros (PC) primièr adjonch a la comuna de Lodeva qu’ofriguèt l’aperitiu; un dinnar dels melhors -regalèmus que s’i mangèt mai que de regardèlas- e un après miègjorn plan capitat menat per un parelh de guidas locaus remirable que s’acabèt dins un ensag de l’acostica de la catedrala qu’es pas maissanta.
A la manòbra lo cercle de Lodeva per una organizacion perfiècha.
Rebat en fòtos. (n’aguèssetz d’autras, siái preneire)

NB: Se d’unes sòcis vòlon los rapòrts que son estats presentats e votats per l’AG (moral, activitats, projèctes, financièr) an que de me los demandar per mèl. Me farai un plaser de los lor faire passar.