CURIOSÈR
Una cronica de l’Eric Asti�
Per parlar un pauc de tot e de tot un pauc
D’escotar tanben sus Ràdio Lengadòc !
Beuchat (2)
Beuchat (2)
Adissiatz mond de Ràdio Lenga d’Òc e adishatz plan.
Nadar jos l’aiga e respirar al mitan del peissum, vaquí l’objectiu ultime al qual començan de trabalhar ingeniaires e tecnicians de la debuta del sègle XIXen.
En 1839 la tota primièra botelha de cabussada es inventada per dos canadians : James Elliot e Alexander Mac Avity.…
Las causas son plan faitas qu’un mètge normand, Manuel Teodòr Guillaumet, aviá inventat l’an d’abans la destenda. Es un mecanisme que fa passar un gas estocat dins un estagi a una cèrta pression, a un estagi de pression inferiora. Per exemple d’una botelha pressurizada a una caissa toracica !
Aicesta destenda es prefeccionada en 1864 per dos avaironeses Beneset Roucayrol e August Denayrouze que ne fan un vertadièr aparelh respiratòri e l’èsser uman se pòt préner per un peis al mens 30 minutas de temps e a 10 mètres de prigondor !
Fasèm de bodenflas, de botiòlas, de bofigas dins l’aiga e arribam al sègle XXen .
En 1912 l’ingeniaire Maurice Fernez crea un autre aparelh respiratòri, mai pichon. Aiçò, es per las brànquias (les branchies). En 1914 las palmas son creadas, aquò, es per las aletas o nadarèlas. E las lunetas arriban en 1920, ailò es per los uèlhs.
Precision => Aiçò, aquò, ailò. ceci, cela, ça-là-bas per enriquir l’utilizacion dels demonstratius que sovent nos limitam al sol aquò, en ignorant los dos autres…
Anecdoticament lo canèl (de respiracion) –le tuba– es creat dins las annadas 30. Fasiá pas preissa que la botelha de cabussada aviá ja practicament 100 ans
L’escafandre autonòme es mes al punt en 1926, la Kriegsmarine desvolopa en 1938 son modèle de regulator de pression, (la destenda melhorada) e dins la família Beuchat, rementatz-vos d’origina soïssa installada sul pòrt vièlh de Marselha, ambe l’ensenha Pêche-Sport obèrta en 1934, Georges seguís de prèp las evolucions tecnicas de sa passion sosmarina.
Quò’s pas complicat : tèsta e vend tot lo dequé indispensable o superflú als amoroses del mond del silenci.
En 1943 a Bandòu dins Var una mesa al punt majorala va permetre l’expansion vertadièra de la cabussada sosmarina. Jacques-Yves Cousteau e Emile Gagnan perfeccionan definitivament l’aparelh respiratòri Rouquayrol-Denayrouse.
Lo fan fisable a 100 %. Automatic permet de respirar jos l’aiga mas e aquò’s çò que fasiá fraita : dins totas las posicions e situacions de nadatge. Enfin…
En parlant d’alenament o de respiracion, l’aire es compausat de 20,9 % d’oxigèn, de 79 % d’azòte, e de 0,1 % de qualques gases mai dont lo gas carbonic. A cada cicle respiratòri inspiram 21 % d’oxigèn mas ne regetam 16 % que sols 5 % nos fan besonh.
La fin de la segonda guèrra mondiala permet la comercializacion de tot aquel material novèl e es lo moment quand Georges Beuchat descabestra son engeni creador. Parallèlament a sas activitats comercialas, ven un dels precursors de las activitats subaqüaticas per exemple es cofondator de 1948 de la FFEES Federacion Francesa d’Estudis e d’Espòrts Sosmarins.
Nadar jos l’aiga, es polit polit, gaitar los peisses tornejar, es plasent plasent mas los pescar per ne far una bolhabaissa quò’s pas marrit tanpauc !
En 1947 Georges crea un fusilh sosmarin o puslèu una balesta (propulsion de sandows) que bateja Tarzan. Lo nom pòt estonar, levat qu’en 1947 Tarzan a una super quòta de popularitat. Es l’actor nòrdamerican Johnny Weissmuller que fa l’interprèt. Nadaire atletic multi medalhat als jòcs olimpics, ambe lo crit de Tarzan que va plan, en 1947 es l’equivalent de Zorro dins las annadas 70 o de John Snow de la seria Jòcs de Trònes, Games of Trons.
Tarzan un nom recurrent en çò de Beuchat : caisson fotografic Tarzan (1950), forrèl-pompilh de ponhal Tarzan (1950), vestit Tarzan (1963).
E la marca de l’espadon (lògo de Beuchat) salva literalament la vida del cabussaire. Inventa lo flotador de susfàcia (lo sauvanegadís) en 1948 e la tenguda de
cabussada en 1953.
De Marselha estant la societat Beuchat vos equipa e vos arnesca del cap als pès, que siá per la cabussada en susfàcia amb l’estrict minimum o que siá per explorar lo mond del silenci pregond en tenguda e botelhas, a observar, fotografiar o caçar.
Tot lo dequé que vos cal se ditz Beuchat Internacional, sens oblidar las mòstras de cabussada e los prigondimètres.
Adissiatz mond de Ràdio Lenga d’Òc, adishatz plan e prenètz suènh de vosautres.
0 commentaires