LAS SENTÉNCIAS DE DIOGÈNES (4)

Escritas a la tinta linfatica! Ê òc, dins nòstres estudis menimoses de l’òbra del filosòf Diogènes, avèm trapat a la Mediatèca Centrala de Cantacocut unes de sos manescrits sus pergamin recopiats per un escribe occitan (a la vista de la lenga emplegada en grafia alibertina pre-classica) e amagats jos l’utilizacion plan especiala de tinta linfatica qu’an pogut èsser revelats mercé a l’esclairatge portat per una entòrcha de Carnaval. Los camins de la coneissença seguisson de còps percors estranhs que sèm mai qu’uroses de ne vos faire aprofitar.

I anam aprèp aqueste descompte a l’anglesa, coma disiá la mameta Alienòr: one, two, fregit e al forn!

A la tinta linfatica

Vaquí doncas la tièra d’aquelas senténcias : las unas enrasigadas dins l’epòca del filosòf ; las autras, portairas de futurisme e d’abans-gardisme predictius.

• Androna: Las andronas te metràn sul bon camin.

• Atots: Fotut coma un ase de picas, joguèt son darnièr atots.

• Balon: L’uòu inventèt lo balon de rugbí.

• Bolh: Cal abaissar lo bolh quand monta.

• Boquet: La ventòrla aviá desgarnit lo boquet garnit.

• Bram: Bramar coma un ase te rendrà pas mai intelligent.

• Cant: Quand Kant cantava, la Sofia filosofava.

• Carinhana: Pas besonh d’anar a Anhana per beure carinhana.

• Caucida: Los piquants de la caucida son la sal de la vida.

• Clapet: Quand lo clapet fa clic-clac, es pas mai temps de faire de claquetas.

• Consciéncia: Que siague bona o marrida, la consciéncia te traparà pas la solucion.

• Cosina: Val mai la tanta que la cosina per faire bona cosina.

• Costelon: Mai lo costelon es long, mai es bon.

• Escalièr: L’escalièr que monta es desparièr de l’escalièr que davala.

• Esitacion: L’esitacion es maire de prudéncia.

• Evolucion: Al sègle 8en, Dòna Carcàs èra sarrazina; al sègle 21, lo conse de Carcassona es RN.

• Farnat: Lo farnat es un plat requist pel tesson.

• Fèsta: Val mai festejada que festum. 

• Fetge: Lo fetge sec es pels lipets del bon bèc. 

• Foliá: Lo baujum nos dobrirà los lums de la consciéncia/de la coneissença.

• Freginat: Triste-a vegan-a lo/la que ditz de mal del freginat. 

• Frigola: De qué fricòta la frigola amb lo romanin?

• Fugida: Al cap de la fugida, te traparàs totjorn fàcia al meteis problèma.

• Fulheton: Perqué se’n faire? L’eròi del fulheton acabarà plan per ganhar… (cf. l’Odissèa)

• Icara: A! se l’Icara aviá conegut l’ULM. 

• Identitat: An una identitat los poletons cunhats per milierats jos un cobèrt del lum artificial?

• Irange: Roge sang es lo chuc de l’irange sanguina.

• Jupitèr: Quant de cuèissas aviá lo Jupitèr per que tant de monde ne sòrte?

• Laberint: La vida es un long laberint. 

• Lausange: Un lausange s’amerita gaire de lausenjas. 

• Musica: Per ne jogar, teniá la contrabassa per ennaut. 

• Nèu: Sus la nèu, los taissons mestrejan lo schuss.

• Nuèit: Jorns lusents e nuèits negras, benlèu qu’avèm pas la causida.

• Paciéncia: La paciéncia es l’enemiga de l’accion.

• Pan: Crompar de pan car es coma reçaupre un carpan.

• Paradòxa: Lo sistèma de la paradòxa es mai complicat que lo del parapluèja.

• Pelejada: Inconscient e subconscient son en pelejada permanenta.

• Pelharòt: Un bon pelharòt te vendriá un clèsc de cagaròt.

• Piqueta: La piqueta es la desfaita del vinhairon.

• Plegar: Se plegas tròp, ven puèi malaisit de se desplegar.

• Plorar: Plorar negarà ton chagrin (o: pas).

• Probabilitat: L’improbable adven mai sovent que lo probable.

• Quadrilatèr: Pel quadrilatèr, cridarem pas: Bis, mas: Tèr!

• Rambalh: M’agrada mai lo rambalh que lo trabalh.

• Retorn: Marchar de recuolons fa pas avançar las causas.

• Siure: Los bons taps son de siure.

• Socit: Val mai faire pescajons que se faire de socit.

• Television: L’embut es de mai en mai poirit.

• Terapeutica: Los benfaits del fenolh son fenomenals.

• Trombone : M’agrada mai lo chuc de la bombona que lo son del trombone.

(varianta: Val mai tirar vin que jogar del tira-buta).

• Vaca: Es encara vaca una vaca sens banas?

• Vacanças: Cal pas partir cansat-da en vacanças.

Filosofant Roch