-
Las prediccions sus las consequéncias del desreglament climatic se complisson en Occitània, e mai al nivèl pus naut. Ongan, las calorassas extrèmas son quitament arribadas quitament abans l’estiu.
Mentretant, lo capitalisme contunha d’amassar de riquesas a una velocitat obscèna. Fa qualques jorns, legissiam dins Jornalet qu’una sola persona possedís ara un bilion de dolars… çò es mila miliards, un milion de milions! Dins un Mond ont la fam, las guèrras e las inegalitats afèctan de centenas de milions de personas, aquela fortuna es simplament repugnanta. Los govèrns que se dison de drecha nègan lo cambiament climatic o ne minimizan los efèctes. Los que se dison d’esquèrra an multiplicat las mesuras cosmeticas sens tocar al còr del problèma. Totes, a la fin, participan a la perpetuacion d’un sistèma economic que destrutz l’environament e privatiza lo profièch en socializant las pèrdas.
E mentre que los miliardaris contraròtlan l’economia, l’immobiliari, los mèdias e quitament las decisions politicas, se cèrca encara de bocs emissaris demest los mai febles, mai que mai los immigrants.
Pasmens, del temps qu’esperam de cambiaments estructurals necites, cal subreviure a las caloradas actualas e a las que vendràn. Per tant, prepausam qualques conselhs:
-
Lo primièr conselh es simple: bevètz d’aiga sovent, quitament sens aver set. Evitatz l’alcoòl e limitatz las bevendas fòrça sucradas, lo cafè e lo tè. Manjatz leugièr e privilegiatz la frucha e las verduras frescas, ricas en aiga.
-
Cal tanben protegir l’ostal. Tampatz pòrtas e fenèstras pendent las oras mai caudas e airejatz l’ostal dins la frescor de la nuèch. Los ventiladors pòdon fòrça ajudar, sustot acompanhats d’un lençòl umid.
-
Entre miègjorn e cinc oras del vèspre, es melhor d’evitar los esfòrces fisics e las activitats esportivas a l’exterior. Se vos cal sortir, cercatz l’ombra, portatz un capèl, de vestits clars e leugièrs, e emplegatz una crèma solara de proteccion nauta. Los efièches del solelh son comolats e lo càncer de la pèl progrèssa cada an.
-
Los pargues, los bòsques, los rius e d’autres espacis verds pòdon venir de vertadièrs refugis de frescor. Dins fòrça vilas existisson tanben de «refugis climatics»: las bibliotècas, los esquipaments publics o los centres socials climatizats ont passar las oras mai complicadas de la jornada.
-
Cal prestar una atencion especiala als enfants, a las femnas prenses, a las personas annadidas e las que patisson de malautiás cronicas. Jamai, jos cap de pretèxt, daissetz pas una persona o un animal dins una veitura pargada.
-
Enfin, escotatz vòstres còrses. La set intensa, la boca seca, los vertiges, las rampas muscularas, la confusion o una temperatura fòrça nauta son de senhals d’alarma. Un còp de calor pòt èsser mortal e demanda una intervencion medicala immediata.
E vosautres, legeires? Avètz de trucs, d’astúcias o d’abituds per melhor suportar melhor los calimasses? Partejatz-las dins los comentaris o suls rets socials de Jornalet. Vòstra idèa ajudarà tota la comunautat a passar l’estiu al fresc.
Bon e suportable estiu!
-
0 commentaires