Chut…, digatz pas que soi de Carcassona!

Vos faguèri ja una cronica sus la situacion a Carcassona a la debuta d’abril ont l’arribada de l’extrèma-dreita a la Comuna  èra ja prometèira de braves embolhs. La realitat confirma las crentas. Avèm l’impression de nos trapar presonièrs d’un marrit film ont los missants pensan d’aver lo polit ròtle. 

De matin, d’unes te dison: « E de qu’a fait lo Conse/la Comuna ièr? » dins lo desespèr de qualque novèl episòdi que farà parlar de Carcassona dins la premsa locala e parisenca e a la television, que balharà un polit imatge de la vila e de sos estatjants. Lo jornal Libération se demanda se Carcassona es pas l’exemple bèl e significatiu d’una gestion Recampament Nacional !

La Comuna a degut tornar véser son decret sus las esmendas rapòrt sus las tengudas indecentas aprèp una intervencion de la Liga dels Dreits de l’Òme  . Avèm agut la fotografia del conse, lo Cristòl Barthès, una palustra a la man, a bastir una paret contra lotjaments utiizats per unes esquataires. Avèm agut tanben la version de la paret que foguèt pas bastida al bon endreit e que los emplegats municipals faguèron tombar dins la nuèit.

I agèt tanben una demanda faita al Musèu dels Masèls de Tolosa de retirar d’una mòstra una òbra qu’a ja virat dempuèi d’ans dins la region. 

Passarem suls Conselhs municipals ont las oposicions an de mal de s’exprimir e, qu’en fin d’acamp, es vengut costumièr que lo conse sòrte una mesura novèla se sap pas d’ont. 

Unes afars bèls

Venèm d’aver dos afars mai bèls. D’en primièr , l’aluserpit de la Policia municipala que daissèt virar a la tardor passada sa camèra pendent 6 oras sens se’n avisar, çò que mòstra ja un cèrt gra de tecnicitat dins lo manejament de la besonha. E aquí, i agèt, long de la nuèit, un fum de prepausses racistas e complotistas que s’encadenèron : un vertadièr florilègi ! La vidèo comencèt de virar dins lo servici e l’agent trapèt res de melhor que de portar plancha per l’ataca contra sa vida privada que constituissiá aquela difusion! Bon, en seguida: congièt malautiá que li permetèt çaquelà de participar a la proteccion del nòvi de la princessa siciliana quand passèt per Carcassona. E, subran, la santat li tornèt per poder reprene de servici un còp lo RN a la Comuna. Cal notar lo pes del silenci costat Comuna (l’anciana de dreita e la novèla RN), lo pauc d’afanament de la justicia que tot aquò seriá passat aisidament al debrembièr se la premsa d’extrèma-esquèrra e gauchisanta, valent a dire lo… Midi-Libre (classament segon la classificacion operada per la municipalitat carcassonesa) aviá pas rendut l’afar public. E aquí, fins al Ministre que s’avisa que dèu prene sanccions.

An seguit los imatges de l’òme escampat brutalament pel sòl per un policièr nacional (jos l’uèlh de policièrs municipals) e que se truquèt lo cap sul quitran a 7 oras del ser lo jorn de la Fèsta de la Musica per çò que… passava de musica! L’òme moriguèt quauques jorns apuèi aparentament e oficialament per d’autras rasons. Dins son retrach dins la premsa arribèron a explicar qu’èra un SDF que… viviá cò de sa maire ! 

A sortir los afars « vièlhs », la premsa locala e lo Tiron encadenat tornèron metre la man sus l’intervencion de l’almoinièr del 3en RPIMA (lo regiment que bailegèt un cèrt Bigeard que n’avèm una estatua bèla en marme de Caunas a l’entrada de la casèrna) per la fèsta de la sant-Miquèl d’octòbre de 2025 dins la catedrala de Carcassona. Lo deputat (vengut conse ara) èra al primièr reng. Lo discors de l’almoinièr èra mai o mens (e puslèu: mai) compatible amb la teoria del grand remplaçament, antifeminista e amb de mai una ataca contra los gauchistas (mas ont comença lo gauchisme per un extrèma-dreita? Al centre-dreit?). Lo prèire es en contradiccion bèla amb çò que ditz lo cap de la glèisa, lo Papa de Roma Leon XIV, que declara que la discriminacion fondada sul sèxe, la raça, la color, la condicion sociala, la lenga o la religion es contrari a l’intencion de Dieu e dèu èsser avalida. Malastrosament, demòra una Glèisa tendéncia Inquisicion…

Qunes episòdis novèls van venir completar aquela istòria que te fa interpellar per çò que siás Carcassonés e quasiment sentit per d’unes coma responsable, veire complici, d’aquela situacion mai que negativa. E ara, dins la vida vidanta, siás jamai a l’abric qu’una persona que coneisses tengue prepaus favorables a l’accion de la Comuna… (çò qu’es pas bon pel moral). Ne son arribats a un punt ont quand la Marina se ven mostrar dins la comuna de Pomars pertocada per la tornada, lo Cristòl Barthès fa pas part dels acompanhaires. Vertat qu’es pas lo simbòl de la dediabolizacion presicada pel RN!

Lo cap d’extrèma-dreita de l’oposicion municipala a Bram denoncia la manca de professionalisme de las instàncias departamentalas audencas del RN.

S’opausar

Se debanèron ja doas manifestacions menadas per un collectiu de joves Nous, Carcassonne per denonciar la politica e los objectius de la Comuna e engimbrar una mobilizacion ciutadana.

Los Têtes raides (que cantavan al festenal redusit e magrinèl òff) passèron veire los sendicalistas de la CGT que son totjorn jos la menaça de fòrabandiment de la Borsa del Trabalh. A Ciutat, lo grop Feu Chatterton acabèt son recital amb una darnièra cançon que lor i semblava mai que necessari d’interpretar: L’Affiche rouge

Arguments per un collòqui

Per ieu, l’avantatge d’aqueles problèmas e d’aqueles episòdis es qu’aurai pas de lagui e d’ oras de recèrca per bastir mon intervencion (amai, me caldrà faire la tria) al collòqui engimbrat pel Partit Occitan a Tolosa lo dissabte 7 de novembre ? ont m’i caldrà parlar de la situacion a Carcassona e dels dangièrs del RN per l’accion occitana: 

« quina democracia per deman ? ».

La salvar e la tornar bastir,…

E non, non, enfins, que siague clar: preni pas las reservacions per la taulejada a venir del Canon français a Carcassona!  !

Mièg-assucat Roch