Escais de vilatges…

En 1982, Claude Achard publicava ( al CIDO) « Les uns et les autres », diccionari satiric dels escais collectius d’Erau.

D’escais de còps demasiats, quitament marrits, Achard drecèt una lista de las 343 comunas. Uèi nombre d’aquels escaisses son mesconeguts, pauc utilizats.

I a de nombroses vilatges dont l’escais dels estatjants es « Sauta ròcs ». S’explica sovent per la geografia : rècs, nautors, bauces… mas tanben per descriure una tèrra paura coma a Aumelàs : « los ròcs possan melhor que la vinha ! » Dins nòstre còr d’Erau, avèm dels « Sauta ròcs » a Cabrièras, Lo Cròs ( veire los blòcs dolomitics) , Lacòsta, Moresa, Pegairòla de l’Escaleta apelats tanben los « escalaires » marchas talhadas al quite ròc per anar sul Larzac! E n’i a d’autres « Sauta ròcs » dins Erau !

Claude Achard relevèt tanben dichas, provèrbis de còps amusants, de còps un pauc trufandièrs !

Sus la meteo se disiá a Arbòras : « Quand lo Ròc (Lo Cailar) pòrta lo capèl, lo pastre se carga lo mantèl » e a Lodeva  quand la bisa bufa : « Nòstra dòna del Cailar davala ».

D’escaisses  ligats a la geografia. A Navacela , «  los manjaires de trochas » e los « gulars » probable a causa del bruch de la cascada, caliá auçar la votz ! A Somont « los manjaires de castanhas ».

Quand un mainatge parlava pas o parlava mal, se lo menava debuta de setembre al pelegrinatge de Parlatges (comuna de St Peire de la Faja). La legenda disiá que parlava pas perque aviá vist lo lop, traumatisme!

Per acabar aquel rapid torn d’orizont, avètz pas dich, d’unes  còps, sus un ton trufandièr : « s’èras arribat un quart d’ora plus lèu, auriás manjat amb nosautres, coma se ditz a… (dire lo nom del vilatge dont vos volètz trufar!) .

Podètz mandar las vòstras anecdòtas a : lipeton@wanadoo.fr

Al còp que ven e tenètz-vos fièrs !