50 frasòtas contradictòrias

Aquí una pichona tièra de 50 frasas mai o mens contradictòrias e afirmativas. S’apièjan sus d’oposicions o de rapròchaments semantics, sillabics o fonetics. A vos de vos petaçar per ne faire l’exegèsi, que ieu declini tota responsabilitat. Las podètz classar dins la tièra de las vertats vertadièras o endacòm mai: a vos de véser!

• Lo blues es una musica plan blosa.

• Una ustra amb una pèrla sap pas s’es embarrassada o rica.

• Los teules teuns son mai polits que los teules meuns/seuns. 

• Pas aisit de faire un topò sul tòpis.

• Los estrucis son vertadièrs destrucis.

• Las amors perdudas desapareisson jamai al demembrièr.

• Nos conflatz amb vòstre conflicte per un pòt de confit.

• Digatz-me la talha del pè de la paret, sens vos comandar. 

• Pas de cogordeta tristoneta dins vòstra sieta. 

• Lo vèrme versatil sap (pas) escriure vèrses.

• Lo reviraire fila dreit.

• En fasent lo palhassa, acabaràs sus la palha.

• Lo volubil fasiá contrapetàrias en bateria.

• La nuèit es pas aisit de mesurar lo diamètre.

• Per un bon raconte, se cal metre en ligason amb la conjugason.

• Pas aisit per un perruquièr d’èsser clòsca-pelada.

• Es possible d’èsser distant-a amb son vesin/amb sa vesina.

• Bom! La veitura vegèt pas la turra!

• Quand n’as dins lo cornet, se parla pas de fritas.

• Lo luòctenent entamenèt una manòbra de contornament.

• Cal aver bona diccion per suportar la contradiccion.

• La garbura vos farà carburar.

• Caucetas traucadas, artelhs liures!

• L’accent circonflèxe es inutil en occitan. (*)

• Una bona mornifla empacha de niflar per un brave moment.

• Te cal metre la mòstra a l’ora d’estiu per trapar mièjorn a doas oras del vèspre.

• Lo viatge es sovent una fugida. 

• Lo paure cocodril plorava lagremas umanas.

• La bediga sap ni la a ni la b.

• La galina pòrta calina.

• Dins la plana, la tramontana ven trista.

• Traparetz pas pasta de pastenaga cò del pastissièr.

• Un còp d’espada dins l’aiga es coma pissar dins un violon.

• Lo ròcafòrt vos rendrà fòrt coma lo ròc. 

• Cal embarrar los espargues dins un pargue. 

• Reservar quatre micas per las formigas.

• Ne cal aver dins la pinha per contunhar de trabalhar la vinha.

• S’es perduda la fotografia ont se vesiá lo Nicefòr faire lo semafòr. 

• Mèfi quand lo cèrç fa virar mabol lo pibol. 

• Lo ser, lo serpol fa virar lo cap als pols. 

• Pensar a res es ja pensar a quicòm. 

• Son cap li doliá: èra plen de voide.

• Vira que viraràs, ne demoraràs tresvirat.

• Caracacà, vòli faire pisson! (***) 

• Lo silenci es d’aur: los muts son setats sus un tresaur.

• Lo camembèrt es plan melhor que lo roge!

• Es pas un solatjament de veire la vida en negre.

• Los uèlhs pòdon pas veire mai luènh que l’asuèlh.

• Entre dire e parlar, cal saupre causir.

• La fin finala existís pas: es just signe de començanças novèlas. 

Frasòt Roch

(*) Los mots occitans pòrtan pas capèl.

(***) Notaretz qu’aquesta frasa es en 44ena posicion dins la tièra!