La Corala de Sant Guilhem

Lo concèrt omenatge au paure nòstre Janòt amb l’imne nacionau d’una nacion qu’existís pas encara que sus las mapas dau futur. Vidèo de Jan Rieupeirós.

Sòrre ainada dau Ceucle Occitan Max Roqueta, la Corala Occitana de Sant Guilhem faguèt tombar sas primièiras gotas en 2004.

Se trachava d’aparar de l’oblit e de promòure lo repertòri occitan e, de temps en quora, de faire viure un repertòri religiós pastat de l’èime de l’abadiá de Gelona.

Amb las annadas e jot l’aflat de son musicaire-cap de còr lo Felip Carcassés lo repertòri a pas mancat de s’enriquesir e de pichonar:

– cants tradicionals occitans de Nadal, de Carnaval, ligats als trabalhs de la tèrra, de velhadas, de breçairòlas, de taulejadas, tot fa ventre!

– cançons tradicionalas de dançar (per acompanhar musicaires e dançaires dins los balètis: borrèias, pòlca, mazurca…)

– cants polifonics sus de tèxtes poëtics de Roqueta, Bodon, Llorca,…

– cants de la nòva cançon occitana de las annadas setanta (Marti o Mans de Breish) o actuala (la Mal coiffée, lo Còr de la plana,…)

– Brassens revirat per Corne d’Aur’Òc (Carcassés e Ciá)

– cants de lucha (per faire petar dins las manif)

– cants religioses (per faire petar dins l’abadiá)

Menada e de quin biais per lo Felip Carcassés desempuòi 2008, la Corala es acompanhada per los instruments que ne jòga : autbòis dau Lengadòc, acordeon diatonic, flaütas, frestèu (flaüta de Pan en rosèu de Camargue), bodega de la montanha negra, cabreta,…

De còps, per de representacions estaticas, Maria Frinkings se ven apondre a son òme Felip amb un segond acordeon.

La Corala de Sant Guilhem es a la gròssa un bon trentenat de cantaires Sautaròcs (estatjants de Sant Guilhem) o dau ròdol e respiècha una paritat òmes-femnas qu’a nombre de coralas aquò ie fa lengueta. Lo repertòri es de cap-a-cima en occitan, mas lo francés –emai siague pas tròp famós- es encara comprés au dintre d’una còla qu’es pas brica academica.

Se d’unes sabon la musica, lo solfègi, los novelaires o los pairòus traucats son los plan venguts. Bassas, tenòrs, alti, soprani e totas voses independentas.

La podrètz ausir, aquela Corala famosa, sus los mercats de Nadau dau rèire país clapassièr, per son Nadau Torn annadièr, totas las dimenjadas de decembre abans Nadau, per la Messa de Mièja-nuòch dins l’abadiá de Gelòna, o dins d’autres registres dins d’unes balètis, concèrts, jornadas occitanas a Mèsa e endacòm mai, e tanplan un pauc d’en pertot dins lo ròdol ont se canta en occitan.