Los Vissonèls

Activitats

• Corses d’occitan, totes nivèls, los dimars a 3 oras. Professor Renat Pourtier.
• Cafès occitans
• Toponimia
• Cants
• Viatges a tematica occitana
• Fèsta de la prima e de la musica

Los Vissonèls de Cabrièiras

Lo cercle occitan « los Vissonèls » de Cabrièiras creat i a mai de 20 ans amb un effectiu permanent de mai de 20 sòcís se balha coma mission :

– de promòure la lenga e la cultura occitana dins lo vilatge e tanben al nivèl de la micro-region en trabalhan subretot amb los cercles occitans de proximitat.

– Accompanhats per l’IEO34, delà dels corses setmanièrs, en sinergia amb de conferencièrs, d’artistas, d’autors, d’istorians, animam un o dos «cafès occitans », organizam un viatge cultural dins de luòcs amb un fòrt passat istoric occitan (Albí, Còrdas sus Cèl, la Covertoirada, l’Estivada a Rodés…)

– l’un dels temps fòrts de las activitats es marcat per l’organizacion de la fèsta de la musica al masatge de « las Cròses ». Aquel luòc es un endrech idilic, un pauc fòra del temps, amagat al mai prigond dels bòsques,un ambient emprenhat d’autenticitat e de serenitat. En mai, una ombrièira plan fresca, çò qu’es força agradiu a l’ora d’ara, pas que de bonaür !

Aquesta fèsta se debana lo dissabte qu’arriba abans la fèsta de la musica. Vos aconselhan de venir partejar amb nautres unes temps d’escambis culturals, culinaris, musicals, literaris, e de convivéncia …

Traparetz tanben de bancas de productors d’aicí, lo talhièr de l’IEO 34.

Aqueste an ambe «  Lo Cocut » e sos cants, los musicaires de la còla « Tindarèl » e lo baleti , lo repais partejat, passèrem un còp de mai un moment fòrça agradiu.

Aquò es pas l’Estivada mas n’es pas tan luènh!

Traparetz aquí qualques fotòs…

Lo secretari : Bruno Astruc