A la coa lanlèra !

Diga ! Lo quite Papa de Roma ven de metre sa pelha a la bugada dins son darrièr sermon, a Venècia, aquesta dimenjada : « Mesfisatz-vos dau subretorisme ! » que diguèt. Coma se lo mond d’un endrech avián la causida. En mai caudriá que siaguèsson d’acòrdi entre eles, segur, çò qu’es luònh d’èsser ganhat.

Fa un parelh d’an Sant Guilhem arribèt en finala dau « vilatge mai polit de França ». Totes los pinzuti, entendètz los parlan ponchuts installats aquí passèron la serada dins lo cafè dau vilatge per ne sosténer la candidatura dins lo temps que los « sautaròcs »[1], los qu’avián una traçabilitat un pauc mai anciana, los « canhòts »[2] vertadièrs e sos amics votavan per l’autre vilatge, occitan tanben, per ganhar pas que de toristas n’an un ratigàs.

Vòls que te diga ? Avèm pas esperat lo Papa. « Non, au bronze cuol d’Euròpa ! » vos sovenètz. E los an pas escotats, l’Ives Roqueta e los autres, e aicí sèm… Mas los elegits renegaires caucan totjorn fòra l’ièra en 2024. Ara partisson en crosada contra la lei d’aparament dau litorau per sauvar sas palhòtas… De la natura se’n garçan coma d’una petola de cabra.

E puòi, sembla que lo mond aimen aquò : èsser esquichats coma d’arencadas. Cau que siagan onte lor dison d’anar a esperar de longa en tièira, dau mètro a la dobertura de las sòldas, per manjar dins lo restaurant brancat o au musèu se far l’auto-retrach 5 segondas davant una Joconda trufarèla. Que dire dels acomolòfis d’alpinistas sus Mont Blanc o Everest ? Qu’es lo pompon sus Garona, que i a pas tant de mond sus lo puòg de la Galina e qu’i siái ben tranquillet amb lo chin, mas crompatz vos un chut.

Mas fin finala es una causa bona. Seràn ja acostumats quand plegaràn parpèlas, que ne serà antau, pauròts, per se faire encendrar au crematòri de sa vila, a la coa lanlèra…

Enfin, es çò que ne dise ieu…

La guinhada de l’IEO34. E, rau !  

[1] Sautaròcs = nom dels estatjants de Sant Guilhem. N’i a pas ges en francés.

[2] Canhòts = escaisnom un pauc mens amistós

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.