Escalièr mecanic

Diga ! Siaguèt un temps que, mercé Paratge, l’enfant de la fornièira dau castèl que pastava michas e amassa bròcas e d’un òme d’armes, lo Bernat de Ventadorn podiá lausar las Dòmnas mai naut jocadas de son temps.  Mas, pecaire, dempuòi Cocorèl a carrejat d’aiga e uòi Paratge te fa rarament esquineta per poder accedir a las esfèras mai nautas de la societat. Val melhor conóisser le bèl fraire dau cosin dau chefe de burèu dau sos-prefècte.

Sens tornar a las calendas grècas qu’i viviá ma tanta Nina, mai pròche de nautres, fa pas gaire, fonccionava l’ascensor social. Mas ailàs, quane sòrt miserable ! dempuòi que vòstre servicial, lo Montamametas, cambièt de mestièr per se vodar cap e tot a la respelida de la lenga d’òc, l’ascensor social es mai que desmargat, en pana a de bon e per totjorn.

E d’aquí los embolhs -escandale vertadièr setmana passada !-  lo Trompeta -coma lo sona l’Alan- demorèt cunhat amb sa polida dins l’escalièr mecanic de l’ONU. Cau dire qu’a aqueste mond que se creson sortits dau trauc de la dòna -los franceses dirián : que naisson amb un culhièr d’argent dins la boca- lor aprenon benlèu pas a pojar los escalièrs d’a patas.

Vòls que te diga ? Bon, vos rassegure, coma o disèm dins la profession : « desencarcerèron » lo parelh de Trompetaires. Mas puòi me daissère dire que lo segond president de color dels Estats Units -e òc podèm dire qu’es lo segond après Obama amb la perosina que s’emplastra per lo morre per semblar un pèl roge, irange Ò desespèr !, – doncas lo Trump conoguèt d’autres problèmas tecnics. Un ecran que s’i aficha lo discors de prononciar que desborronèt, e puòi la sonorizacion que lo daissèt bocabadat.

Aicí sèm, a l’ONU las maquinas prenon lo poder. L’IA a comprés que se podiá passar de la conariá naturala made in America !

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.