M’as colhonat, m’as pas vist !

 

Diga ! Abans que de vos faire aquela prenguère mas precaucions. Òm sap pas jamai, se cau mesfisar, mai que mai als temps que sèm quand òm se sarra dau monde de la vesença. Avèm pro d’emmèrdas coma aquò e es pas lo moment de se faire emmascar o de pèrdre la bola (de cristal). Montère doncas a la jaça dau Joan Serrana, lo masc dau país, un papeta vièlh coma un camin que fa un pauc l’adobaire, un pauc l’endevinhaire. Bon, siái pas capbord : carguère lo tricòt a la revèrs, metère una cabòça d’alh dins la pòcha drecha de las cauças, escampère un planponh de sal per dessús l’espatla gaucha abans que de m’adralhar cap a a sa cajaròca. E, pensatz, evitère d’i anar per lo tresluc quand son poder malefic es dins son plen. Tanben, li portère la botelha de 51 per me l’amanhagar e li onchar la carrèla. Après las salutacions d’usatge, estaquère mon bot e li diguère ma rastelada. Lo vièlh capejava, mut. Quand s’empassèt son seisen o seten pastagàs -mauresca-lausèrda-poma d’amor, dos còps- lo lum i venguèt au granièr e me donèt, es un biais de dire, sa benediccion e un mot de recomandacion sus un papièr crassós per sa confraira agatenca…

Vòls que te diga ? Vaquí mon idèa. Legiguèretz coma ieu la premsa e aquela dau cònsol Los Republicans d’Agde que se faguèt colhonar de primièira per una vesenta ventrilòca que capitèt d’i sostraire 300 000 èuros de fonses publics. Vaquí, me pense de sollicitar aquela dòna tant talament competenta e d’i demandar ajuda. Quand la deslargaràn çò va solet. M’escotèsse, vendriá una vesenta ventril’Òc, sonariá lo Macron amb la votz dau Simon de Monfòrt, aquela d’Arnaud Amaurí l’amòrri e la d’Innocent lo tresen. Aquela tripleta ganhanta poiriá dins una sonada telefonica daissar entendre au president de França que se penedon de tot lo mal que nos faguèron e lo butar a virar lèu fach, plan fach, 300 000 èuros sus lo compte en banca de l’IEO34 o aquel de ràdio Lengadòc que, pecaire, i a que l’argent que nos fa pas la guèrra. Aquò per començar, solide…

Enfin, es çò que ne dise ieu…

 

La guinhada de l’IEO34. E, rau !

low angle photo of concrete bridge

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.