Reclama personalizada

Diga ! Quand lo « din-dan » de la pòrta de la librariá de l’IEO me desperta dau penequet d’après dinnar, i vau totjorn, gaujós e benvolent, d’un :

• Adieussiatz !

Las responsas son cambiadissas :

• Adieu, per lo militant occitanista que davala especialament a Besièrs per far lo plen de libres e que tuteja tot lo monde,
• Bon dia, s’es un catalan en barrutla e dau fòrt poder de crompa. Serà bona la jornada !
• B’jour, per un francimand. Aquí pas grand causa a esperar que tot lo fons es en occitan…
• Hello, de temps en quora amb los toristas que visitan la vila vièlha.

Ai lèu fach de veire coma aquò va virar, emai mas cauças se siaguèsson pas estrifadas sus los bancs de las grandas escòlas de comerci de París : HEC o  ESSEC Business Eschool -luònh se’n manca qu’èran a se verdejar sus la pelena de Pau Va amb los companhs de la famosa promocion « botifarra ». Sens m’enganar de tròp, pòde devinhar se capitarai a abenar L’enterrament a Sabre dau Manciet o  la Fèsta de Lafònt, los dos tòmes ; s’ai a far a un Bodonista incondicional o un Roquetian fanatica dau canal istoric ; se la practica me va crompar Visca lo Sénher President, l’òbra mèstra dau Marc Rossèl o sonque degalhar qualques èuros sus la Macarelada : paratoalha o drapelon…

Vòls que te diga ? Los ipermarcats son pas tan finaudèls ! Son a metre en òbra tota una estrategia d’analisa de tas piadas numericas per te prepausar sus un ecran gigant, tre l’intrada dau magazin e mercé la reconoissença faciala, la promocion que te pòt pertocar e faire caufar ta carta blava. Te siaguèsses pas barbejat de qualques jorns auràs drech a una reclama per unas lamas de rasor, ta tanta Nina veirà sus la television una bòta de pòrre dau prètz ridicule per faire la sopa, l’Eric una berreta Laulhère, l’exibicionista dau canton de la carrièira un impermeable nòu.

Curiós coma un pet, i anère faire pinchon. La senténcia tombèt coma un còp de punhal : cambajon, fricandèu e Sanch Inhan…

Cau de tot monde per faire un mond…

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.