La lenga demesida

Dos exemples recents mòstran la marrida passa constanta ont se trapa nòstra lenga : la disparicion de Conta-Monde sus las ondas de France-Bleu Occitanie e l’afar de causida de noms per las carrièras en Avairon.

E òc, una lenga « locala » sus una ràdio que met en abans lo nom de l’Occitania (la petita çaquelà ; amai pichona, lo tèrme significa res per eles…) aquò’s pas suportable pels responsables d’una cadena publica que s’esfòrça de privar sos auditors e lo territòri de l’expression de la lenga viva e istorica del país. Tot aquò es vengut ara d’una logica imparabla.

De qué ne pensan Catinon e Jacotin, de qué ne diriá lo Martin de Castanet del temps ont la lenga podiá al mens faire rire o sorrire sus las ondas de Ràdio Tolosa.. I agèt L’Ora occitana bailejada per l’Andrieu Lagarda, puèi lo trabalh bèl de Maurici Andrieu, seguit pel Benaset Ros e lo Geraud Delbès perseguissent la cadena. E puèi : quasiment res pus dins l’indiferéncia quasi-generala e coma lo camin d’una uniformatizacion considerada coma normalitat o normalizacion. Lo silenci ven de mai en mai pesuc.

S’ajusta a aquesta malparada l’exemple bèl del Sindicat Mixte per la Modernizacion Numerica e l’Engenhariá Informatica de las Collectivitats qu’òbra pel Departament d’Avairon e que demanda a las Comunas d’esvitar los noms en occitan per las carrièras, rotas, avengudas, baloards… Cal d’una part constatar qu’aquela demanda de denominacion de totas las carrièras demandada per la Pòsta e d’autres servicis a pas joslevat una granda accion occitana per demandar la presa en compte de l‘occitan, de la toponimia locala, dels noms de personalitats de l’istòria e de las arts del país… I pòt plan aver tèxtes europèus que demandan la presa en compte de las lengas localas, de las designacions istoricas aquò va pas incitar comunas e autras collectivitats o tot plan d’Occitan, Lenga Viva de seguir l’afar. Agèron lo començament de la debuta de l’entama d’una reflexion sus la question ? Avèm totjorn, coma dins aquesta cronica, la possibilitat bèla d’exprimir nòstres regrèts e de plorinejar en lagrèmas bèlas e autenticas. L’IEO pòt plan realizar una carta IGN informatizada, qual es son pès se los tèrmes son pas utilizats e vesibles dins la vida vidanta ?

Quala es la responsa d’un moviment occitan complètament esparpalhat ont plan de monde fa d’accions dins son canton, dins son domèni, e ont l’accion sus l’ensemble del territòri es un pauc-fòrça-tròp daissada de caire ? Quala estructura pren per lo mens lo cap d’una proèsta (corrièrs, peticions,…) ? Qual tipe d’accion pertocant Occitania tota se pòt menar ? Jos quna fòrma ?

Las responsas de trapar e de balhar las podètz considerar coma vòstres devers de vacanças…

Lengatonet Roch